Sálmmaid girji 111

₁Halleluja!

Mun giittán Hearrá oppa váimmustan

vuoigatlaččaid searvvis,

searvegotti gaskkas.

₂Stuorrát leat Hearrá dagut!

Gii daid ráhkista, dat guorahallá daid.

₃Allagat ja imašlaččat leat su dagut,

agálaččat bissu su vanhurskkis váldi.

₄Son diktá min muitit iežas oavdduid.

Váibmoláđis ja árbmugas lea Hearrá,

₅son biebmá daid geat ballet sus,

son muitá lihtus agálaččat.

₆Son čájehii álbmogasas iežas fámu,

go son attii dasa

eará álbmogiid eatnamiid.

₇Buot daguinis son lea

oskkáldas ja vuoiggalaš,

su gohččumat eai rievdda.

₈Dat bissot nanusin álo ja agálaččat,

dat leat dahkkojuvvon

oskkáldasvuođas ja vuoigatvuođas.

₉Son vuolggahii álbmogasas lonástusa,

son ásahii lihtus agálaš áigái.

Su namma lea bassi ja hirbmatlaš!

₁₀Hearrá ballu lea viissisvuođa álgu,

viissis dat gii dahká su dáhtu.

Su rámádus bissu agálaš áigái.