Sálmmaid girji 112

₁Halleluja!

Ávdugas dat gii ballá Hearrás

ja gávdná ilu su báhkkomiin.

₂Su nálli šaddá fámolažžan eatnamis,

vuoigatlaš olbmuid sohka

buressivdniduvvo.

₃Su viesus lea vallji ja riggodat,

su vanhurskkisvuohta

bissu nanusin agálaččat.

₄Seavdnjadasas ihtá čuovga

vuoigatlaččaide.

Vanhurskkis lea váibmoláđis ja árbmugas,

₅bures geavvá dan olbmui

gii millosit addá loanas,

gii lea vuoiggalaš buot das maid dahká.

₆Son ii guossal goassege,

vuoiggalaš olbmo muitu bissu agálaččat.

₇Ii son bala bahás ságain,

su váibmu lea nanus,

son dorvvasta Hearrái.

₈Son lea oadjebas iige bala,

son beassá oaidnit

mo su vašálaččat gahččet.

₉Son gilvá váivvášiidda attáldagaid,

su vanhurskkisvuohta bissu nanusin,

son aliduvvo ja oažžu gudni.

₁₀Ipmilmeahttun oaidná dan ja suhttá,

son gáská bániid, son hahpá.

Ipmilmeahttumiid hálidus duššá.