Sálmmaid girji 113

₁Halleluja!

Máidnot Hearrá, su bálvaleaddjit,

máidnot Hearrá nama!

₂Hearrá namma lehkos máidnojuvvon

dál ja gitta agálaš áigái!

₃Beaivváža badjáneami rájes

dan luoitádeami rádjái

lehkos Hearrá namma máidnojuvvon!

₄Hearrá lea allat,

buot álbmogiid gonagas,

su hearvásvuohta badjána alibun go albmi.

₅Gii lea Hearrá, min Ipmila, veardásaš?

Son čohkká truvnnustis allagasas

₆muhto oaidná vulos eatnama čiekŋalassii.

Ii almmis iige eatnama alde

leat su veardásaš!

₇Son čuoččáldahttá vártnuheami gunas,

son bajida geafi rábáhis

₈ja diktá su čohkánit stuorráid searvái,

iežas álbmoga oaivámuččaid báldii.

₉Son addá šattohis nissonii ruovttu,

addá sutnje mánáid ja eadnivuođa ilu.

Halleluja!