Sálmmaid girji 114

₁Go Israel vulggii Egyptas,

go Jakoba nálli guđii vieris eatnama,

₂de dalle Juda šattai Hearrá

bassi opmodahkan,

Israel su riikan.

₃Mearra oinnii dan ja báhtarii,

Jordaneatnu jorggihii ruoktot.

₄Várit njuikkodedje dego vierccat,

dievát nugo lábbát.

₅Mearra, mii dutnje šattai,

go don báhtarat?

Jordan, manne don jorggihat ruoktot?

₆Várit, manne dii njuikkodehpet

dego vierccat,

dii dievát nugo lábbát?

₇Eanan, doarggis Hearrá muođuid ovddas,

Jakoba Ipmila ovddas!

₈Son nuppástuhttá bávtti jávrin,

garra geađggi čáhceájan.