Sálmmaid girji 115

₁Ale midjiide, Hearrá,

ale midjiide atte gudni,

muhto atte gudni iežat nammii,

donhan leat árbmugas ja oskkáldas!

₂Manne álbmogat beasašedje dadjat:

“Gos lea sin Ipmil?”

₃Min Ipmil lea almmis,

son dahká buot maid dáhttu.

₄Álbmogiid ipmilat leat silba ja golli,

olbmogieđa duodji.

₅Njálbmi dain lea, muhto eai dat sártno,

čalmmit dain leat, muhto eai dat oainne.

₆Bealjit dain leat, muhto eai dat gula,

njunni dain lea, muhto eai dat havsse.

₇Gieđat dain leat, muhto eai dat dovdda,

juolggit, muhto eai dat máhte vázzit,

ii daid čoddagis gullo jietna.

₈Dakkárin šaddet daid dahkkit,

buohkat geat dorvvastit daidda.

₉Israel, dorvvas Hearrái!

Son lea du veahkki ja galba.

₁₀Arona sohka, dorvvas Hearrái!

Son lea du veahkki ja galba.

₁₁Dii geat ballabehtet Hearrás,

dorvvastehket Hearrái!

Son lea din veahkki ja galba.

₁₂Hearrá muitá min

ja buressivdnida min.

Son buressivdnida Israela soga,

son buressivdnida Arona soga.

₁₃Son buressivdnida

daid geat ballet sus,

sihke smávváid ja stuorráid.

₁₄Vare Hearrá dagašii din eatnagin,

din ja din mánáid!

₁₅Vare din buressivdnidivččii Hearrá,

almmi ja eatnama sivdnideaddji!

₁₆Albmi lea Hearrá albmi,

muhto eatnama son lea addán olbmuide.

₁₇Jábmit eai máinno Hearrá,

ii oktage gii lea njiedjan jaskatvuhtii.

₁₈Muhto mii máidnut Hearrá

dál ja gitta agálaš áigái.

Halleluja!