Sálmmaid girji 118

₁Giitet Hearrá!

Son lea buorre,

su árbmu bistá agálaš áigái.

₂Celkos Israela álbmot:

Su árbmu bistá agálaš áigái.

₃Celkos Arona sohka:

Su árbmu bistá agálaš áigái.

₄Celket, dii Hearrá bálvaleaddjit:

Su árbmu bistá agálaš áigái.

₅Áŧestusas mun čurvon Hearrái.

Son gulai mu ja doalvvui mu friddjavuhtii.

₆Go Hearrá lea muinna,

de mun in bala mastege.

Maid dalle vedjet olbmot dahkat munnje?

₇Go Hearrá lea muinna ja veahkeha mu,

de mun sáhtán

geahččat vašuheddjiidasan

inge bala.

₈Buoret lea dorvvastit Hearrái

go luohttit olbmuid veahkkái.

₉Buoret lea dorvvastit Hearrái

go luohttit stuorráid veahkkái.

₁₀Buot álbmogat birastahtte mu,

muhto mun časken daid Hearrá vehkiin.

₁₁Dat čoagganedje mu birra

juohke guovllus,

muhto mun časken daid Hearrá vehkiin.

₁₂Dat birastahtte mu dego mieđašeanit,

muhto jávkkihedje

dego buolli bastilislánját.

Mun časken daid Hearrá vehkiin.

₁₃Mu vašálaččat norddastedje mu

nu ahte mun masá gahččen,

muhto Hearrá bođii munnje veahkkin.

₁₄Hearrá lea mu fápmu ja máidnunlávlla,

son besttii mu.

₁₅Gullet, ávvudeapmi ja vuoitočuorvasat

gullojit vanhurskásiid gođiin:

Hearrá giehta lea čájehan fámus!

₁₆Hearrá giehta lea min badjelis.

Hearrá giehta lea čájehan fámus!

₁₇In mun jáme, mun ealán

ja muitalan Hearrá daguid.

₁₈Garrasit Hearrá bagadii mu,

muhto son ii addán mu jápmima gihtii.

₁₉Rabastehket munnje

vanhurskkisvuođa poarttaid!

Mun manan sisa ja giittán Hearrá.

₂₀Dát lea Hearrá poarta,

dákko ožžot vanhurskásat mannat.

₂₁Mun giittán du, go don gullet mu

ja gádjot mu.

₂₂Geađgi maid huksejeaddjit hilgo,

lea šaddan čiehkageađgin.

₂₃Hearrá lea dan dahkan,

ja dat lea ovddolaš min čalmmiide.

₂₄Dát lea dat beaivi

maid Hearrá lea dahkan,

ávvudehkot ja illudehkot!

₂₅Hearrá, beastte min!

Hearrá, divtte min lihkostuvvat!

₂₆Buressivdniduvvon lehkos son

guhte boahtá Hearrá nammii!

Mii buressivdnidit din Hearrá viesus.

₂₇Hearrá lea Ipmil,

son attii midjiide čuovgasa.

Mannet ávvujoavkun, lastaoavssit gieđas,

gitta áltára čorvviid rádjái.

₂₈Don leat mu Ipmil, mun giittán du,

Ipmilan, mun rámidan du sakka.

₂₉Rámidehket Hearrá,

dasgo son lea buorre,

su árbmu bistá agálaš áigái.