Sálmmaid girji 129
Sálbma 129
1Bassivádjoluslávlla.
Sakka mun lean áŧestuvvon
nuorravuohtan rájes
– nu dadjos Israel –
2Sakka mun lean áŧestuvvon
nuorravuohtan rájes,
muhto in leat vuoittáhallan.
3Sii leat jorgon mu sealggi
ja dahkan jorgunluottaideaset guhkkin.
4Muhto Hearrá lea vuoigatlaš,
son lea čuohppan gaskat
ipmilmeahttumiid báttiid.
5Buohkat geat vašuhit Siona,
šaddet geassádit heahpanemiin.
6Sii leat dego rásit dáhki alde:
Dat goldnet dalán go leat ihtán,
7dat eai deavdde ladjoolbmá goapmira
eaige dan sala gii čatná gordnegihpuid.
8Ii oktage gii manná meattá, daja:
Hearrá buressivdnidehkos din.
Mii buressivdnidit din Hearrá nammii.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
