Sálmmaid girji 141

Hearrá, mun čuorvvun du.

Boađe hoahpus mu veahkkin,

gula mu jiena go mun čuorvvun du!

₂Divtte mu rohkosa

leat oaffarsuovasin du muođuid ovddas,

mu bajiduvvon gieđaid eahkedisoaffarin.

₃Hearrá, bija gáhttejeaddji

mu njálmmi ovdii,

gáhtte mu baksamiid uvssa.

₄Ale divtte mu váimmu sodjat bahái,

dahkat ipmilmeahttun daguid

vearredahkkiiguin,

ale divtte mu borrat

sin njálgga borramušaid.

₅Vuoigatlaš olmmoš oažžu cábmit

ja bagadit mu ráhkisvuođas,

muhto ipmilmeahttumat eai oaččo

golggahit oljju mu oaivvi ala.

Mu anán álo rohkosa

sin bahávuođa vuostá.

₆Sin oaivámuččat norddastuvvojit

báktedardda badjel,

sii áddejit man láđđásat ledje mu sánit.

₇Nugo olmmoš jorgu ja guohkká eatnama,

nu sin dávttit biđgejuvvojit

jábmiidáimmu njielu lusa.

₈Hearrá, mu Hearrá,

mu čalmmit gehččet dutnje,

dutnje mun dorvvastan.

Ale divtte mu eallima mannat duššás!

₉Gájo mu gielain maid sii bidjet mu ovdii,

gájo mu vearredahkkiid gillariin.

₁₀Divtte ipmilmeahttumiid

darvánit iežaset firpmiide,

muhto suova mu

beassat dearvan daid meaddel.