Sálmmaid girji 142

₂Mun čuorvvun Hearrá alla jienain,

mun rohkadalan jitnosii Hearrá.

₃Mun golggahan iežan morrašiid

su ovdii,

sutnje mun muitalan iežan heađi.

₄Mu vuoigŋa vuoimmehuvvá,

muhto don almmatge dovddat mu bálgá.

Dan geidnui man vádjolan,

leat čihkkojuvvon gielat mu várás.

₅Geahča mu, de oainnát

ahte ii oktage veahket mu.

Mus ii leat suodji gosa báhtarit,

ii oktage beroš mo munnje geavvá.

₆Hearrá, mun čuorvvun dutnje.

Mun dajan: Don leat mu suodji,

mu oassi ealli olbmuid eatnamis.

₇Guldal mu váidalančuorvasa,

mun lean šaddan vártnuheapmin.

Beastte mu doarrádalliid gieđas,

sii leat munnje ilá gievrrat.

₈Doalvvo mu olggos giddagasas,

nu ahte mun sáhtán máidnut du nama.

Vuoigatlaččat čoagganit mu birra,

dasgo don dagat buriid munnje.