Sálmmaid girji 143

Hearrá, gula go mun rohkadalan,

guldal mu njuoras átnuma!

Vástit munnje, donhan leat

oskkáldas ja vanhurskkis!

₂Ale doalvvo bálvaleaddját

dubmejuvvot,

dasgo ii oktage leat du ovddas vanhurskkis.

₃Vašálaš doarrádallá mu,

ja časká mu eatnamii.

Son bidjá mu ássat seavdnjadasas,

dego áigá juo jápmán olbmot.

₄Mu vuoigŋa vuoimmehuvvá,

mu váibmu stirdu balus.

₅Mun muittašan dološ beivviid,

smiehtadan buot du daguid,

suokkardan du gieđaid dujiid.

₆Mun geaigguhan gieđaid du beallái,

mu siellu áibbaša du

dego goikan eanan čázi. Sela

₇Vástit munnje, Hearrá!

Doama vástidit, mu vuoigŋa roahppána.

Ale čiega mus muođuidat,

aman šaddat daid láhkásažžan

geat leat mannan hávdái.

₈ Divtte mu muosáhit

du oskkáldasvuođa iđidiid,

dasgo mun dorvvastan dutnje!

Čájet munnje geainnu man galggan vádjolit,

danin go mun bijan doaivvu dutnje.

₉Hearrá, beastte mu mu vašálaččain!

Mun ozan suoji du luhtte.

₁₀Oahpat mu ollašuhttit du dáhtu,

dasgo don leat mu Ipmil.

Vare du buorre Vuoigŋa láidešii mu

dássidis eatnama mielde.

₁₁Namat dihte, Hearrá, atte mu eallit!

Doalvvo mu olggos áŧestusas,

don guhte leat vuoigatlaš!

₁₂Duššat mu vašálaččaid,

don guhte leat oskkáldas!

Heavat buohkaid geat bivdet mu heakka,

dasgo mun lean du bálvaleaddji.