Sálmmaid girji 146

₁Halleluja!

Máinno Hearrá, mu siellu!

₂Mun máinnun Hearrá nu guhká go ealán,

mun lávllun Ipmilasan

dan botta go ain lean eallimin.

₃Allet dorvvas fámolaččaide,

olbmuide geat eai sáhte veahkehit.

₄Sii rohttejit heakkaset,

sii šaddet fas muoldan,

dalle sin áigumušat nohket.

₅Lihkolaš dat gean veahkki lea Jakoba Ipmil,

lihkolaš dat gii dorvvasta Hearrái, Ipmilasas.

₆Hearrá dagai almmi ja eatnama

ja meara ja buot mii dain lea.

Hearrá lea oskkáldas agálaš áigái.

₇Hearrá doaimmaha vuoigatvuođa

dulbmojuvvon olbmuide,

son addá láibbi daidda geat nelgot,

son čoavdá daid geat leat čadnojuvvon.

₈Hearrá rabasta čalmmehemiid čalmmiid,

son čuoččáldahttá daid

geat leat hearddohuvvan.

Hearrá ráhkista vuoigatlaš olbmuid,

₉son várjala vierrásiid

ja doarju leaskkaid ja oarbásiid,

muhto ipmilmeahttumiid geainnu

son dahká mohkkájin.

₁₀Hearrá lea gonagas agálaš áigái.

Son lea du Ipmil, Sion, buolvvas bulvii.

Halleluja!