Sálmmaid girji 147

₁Halleluja!

Buorre lea lávlut rámádusa min Ipmilii,

máidnunlávlla lea čáppat ja heivvolaš.

₂Hearrá hukse Jerusalema,

son čohkke Israela biđgejuvvon álbmoga.

₃Son buorida daid

geain lea cuvkejuvvon váibmu,

son čatná sin háviid.

₄Son diehtá násttiid logu,

son lea addán buot daidda nama.

₅Min Hearrá lea stuoris ja fámolaš,

su viissisvuohta ii leat mihtideames.

₆Son doarju vártnuhemiid,

muhto ipmilmeahttumiid

son časká eatnamii.

₇Lávlot giittuslávlaga Hearrái,

čuojahehket lyrain giitosa min Ipmilii!

₈Son gokčá almmi balvvaiguin

ja addá arvvi eatnamii,

son bohciidahttá váriid rási.

₉Hearrá addá fuođđara omiide,

son biebmá gáranasčivggaid go dat čurvot.

₁₀Ii son illut heastta givrodaga dihte,

ii son beroš olbmá lášmes lávkkiin.

₁₁Hearrá ráhkista daid geat ballet sus,

daidda geat bidjet doaivvu su árbmui.

₁₂Rámit Hearrá, Jerusalem!

Máinno Ipmilat, Sion!

₁₃Son nanosmahttá du poarttaid smarttáid

ja buressivdnida du gávpoga mánáid.

₁₄Son addá lihku ja ráfi du eatnamii

ja galleha du buoremus nisuiguin.

₁₅Son vuolggaha gohččuma eatnama ala,

hoahpus olle su sátni.

₁₆Son diktá muohttaga gahččat

ulluid láhkái,

son biđge bizi dego gunaid.

₁₇Son suohppu čuorbmasiid dego moaluid,

su buolaš jiekŋuda čázi.

₁₈Son gohčču, ja jiekŋa suddá,

son diktá biekka bossut, ja čázit golggiidit.

₁₉Son lea almmuhan sánis Jakobii,

lágaidis ja gohččumiiddis Israelii.

₂₀Daid son ii almmuhan eará álbmogiidda,

su lágaid eai earát dovdda.

Halleluja!