Sálmmaid girji 3
Sálbma 3
1Davida sálbma, go son lei báhtareamen bártnistis Absalomis.
2Hearrá, man eatnagat leat mu vašálaččat!
Olusat čuožžilit mu vuostá.
3Eatnagat dadjet mu birra:
“Ipmil ii beastte su.” Sela
4Muhto don, Hearrá, leat mu galba,
don leat mu gudni, don loktet mu oaivvi.
5Mun čuorvvun jitnosit Hearrá,
ja son vástida munnje bassi váristis. Sela
6Mun veallánin ja nohkken,
mun gohccájin,
Hearrá doarjala mu.
7Mun in bala logiduhát olbmás
geat áŧestit mu juohke bealde.
8Čuožžil, Hearrá! Beastte mu, Ipmilan!
Don časkkát mu vašálaččaid muhtui,
don cuvket ipmilmeahttumiid bániid.
9Veahkki boahtá Hearrás.
Atte buressivdnádusa álbmogasat! Sela
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
