Sálmmaid girji 32

Ávdugas dat gean rihkkumat

leat ándagassii addojuvvon,

gean suttut leat čihkkojuvvon.

₂Ávdugas dat olmmoš

geasa Hearrá ii logahala suttu

ja gean vuoiŋŋas ii leat

behtolašvuohta.

₃Nu guhká go mun orron jávohaga,

de mu dávttit sotne,

mun luibmen geažos beaivvi.

₄Du giehta dettii mu

lossadit ijatbeaivái.

Mu vuoibmi jávkkai dego

lávttadas geasi báhkas. Sela

₅Mun dovddastin suddon dutnje,

mun in čiehkan rihkkumiiddán.

Mun dadjen: “Mun dovddastan

suttuidan Hearrái.”

Ja don váldet eret

mu suddovealggi. Sela

₆Dan dihte du oskkáldas olbmot

rohkadallet du áŧestusa áiggi.

Vaikko stuorra čázit badjánivčče,

de dat eai olat sin.

₇Don leat mu suodji,

don várjalat mu áŧestusas,

don divttát bestojumi ávu

čuodjat mu birra. Sela

₈Mun oahpahan du

ja čájehan dutnje geainnu

man galggat vádjolit,

mu čalmmit gehččet du lávkkiid.

₉Ale leage dego jierpmehis eallit,

nugo heasttat dahje mulat

maid ferte dápmat suittiiguin

ja njálbmeruvddiiguin,

muđui dat eai boađe du lusa.

₁₀Ipmilmeahttumis leat ollu váivvit,

muhto Hearrá árbmu

birastahttá dan gii dorvvasta Hearrái.

₁₁Illudehket Hearrás!

Ávvudehket, dii vanhurskásat!

Čurvot ávus, dii geaid váibmu

lea vuoigatlaš!