Sálmmaid girji 33

₁Bajidehket ávvučuorvasa Hearrái,

dii vanhurskásat,

vuoigatlaččat, lávlot Hearrá máidnuma!

₂Rámidehket su lyrain,

čuojahehket sutnje logisuonat hárppain.

₃Lávlot Hearrái ođđa lávlaga,

čuojahehket čábbát ja čurvot ilus.

₄Hearrá sátni lea duohta,

son lea oskkáldas buot das maid dahká.

₅Son ráhkista vuoigatvuođa

ja vanhurskkisvuođa,

su oskkáldasvuohta deavdá eatnama.

₆Hearrá lea sániinis

sivdnidan almmi,

daid veaga iežas njálmmi

vuoiŋŋanasain.

₇Dego lihttái son čohkkii

meara čáziid,

bijai čiekŋalasaid rávnnjiid

vuorkkáidasas.

₈Ballos Hearrás oppa máilbmi,

doarggistehkoset su ovddas

buot eatnama ássit.

₉Son sártnui, ja dat šattai,

son gohčui, ja dat dáhpáhuvai.

₁₀Hearrá moive álbmogiid

áigumušaid,

dahká duššin olbmuid čearddaid

jurdagiid.

₁₁Hearrá áigumuš bissu agálaččat,

su váimmu jurdagat buolvvas bulvii.

₁₂Ávdugas dat álbmot

man Ipmil Hearrá lea,

dat álbmot maid son lea válljen

opmodahkanis.

₁₃Almmis Hearrá geahččá eatnamii

ja oaidná juohke olbmo.

₁₄Truvnnustis son geahččá

buohkaide geat ásset

eatnama alde,

₁₅geaid váimmu son lea dahkan.

Sin daguid son dovdá visot.

₁₆Ii gonagas vuoitte

stuorra veagainis,

eai jálu gájo su iežas searat.

₁₇Ii oktage sáhte luohttit

heastta gádjut su,

ii dat beastte ovttage

gievravuođainis.

₁₈Muhto Hearrá goziha daid

geat ballet sus,

daid geat luhttet su oskkáldasvuhtii.

₁₉Son čoavdá sin jápmimis

ja gádju sin nealggis.

₂₀Mii vuordit Hearrá áibbašemiin,

son lea min veahkki ja min galba.

₂₁Son lea min váimmu illu,

mii dorvvastit su bassi nammii.

₂₂Hearrá, árpmit min,

dasgo mii vuordit du.