Sálmmaid girji 35

Hearrá, dubme daid

geat vašuhit mu!

Soađa daiguin geat sohtet muinna.

₂Dohppe vearjjuid ja galbba,

boađe munnje veahkkin!

₃Váldde sáitti ja soahteákšu,

mana daid vuostá

geat doarrádallet mu.

Cealkke mu sillui:

“Mun lean du bestojupmi.”

₄Divtte bilkiduvvot

ja šaddat heahpanit daid

geat bivdet mu heakka.

Divtte gáidat ja heahppášuhttojuvvot

buohkaid geat dáhttot munnje bahá.

₅Vare sii livčče dego sáđut biekkas,

go Hearrá eŋgel nordada sin eret.

₆Šaddos sin geaidnu seavdnjadin

ja njaláhassan,

doarridehkos sin Hearrá eŋgel.

₇Almmá siva haga sii lebbejedje

fierpmiset mu ovdii,

rogge mu várás bivdorokki.

₈Vare vuordemeahttun

lihkuhisvuohta deaividivččii sin,

ja sii ieža darvánivčče dan fierbmái

maid leat lebben,

vare sii ieža gahčašedje sorbmái!

₉Muhto mun ávvudan Hearrás

ja illudan su bestojumis.

₁₀Mu siskkildas čuorvu:

Hearrá, gii lea du veardásaš?

Don beasttát vártnuheami das

gii lea sutnje menddo gievra,

don gájut váivváša

ja geafi das gii speadjá.

₁₁Vearreduođašteaddjit čuožžilit

ja jerret mus dakkáriid

maid mun in dieđe.

₁₂Sii mávssahit buori baháin,

mun lean ollásit hilgojuvvon.

₁₃Mun gárvodin horstta

go sii ledje buohcamin,

mun váivvidin iežan fástudemiin.

Mun rohkadallen gomuoivviid

₁₄dego ustiba dahje vielja ovddas.

Mun vázzen guvrril,

morašbiktasat gárvun,

dego dakkár gii morašta eatnis.

₁₅Muhto go mun suibon,

de sii čoagganedje ilus,

sii bohte ovttas časkit mu

almmá mu dieđekeahttá.

Sii gaikkodedje ja gazzo.

₁₆Ipmilmeahttumat bilkidit

ja hiddjidit mu,

sii gižahit munnje bániid.

₁₇Man guhká don áiggut

geahččat dán, Hearrá?

Gájo mu gaikkodeddjiin,

beastte mu heakka ledjoniin!

₁₈Mun giittán du

stuorra čoakkalmasas,

máinnun du

eatnat olbmuid searvvis.

₁₉Ale divtte

behtolaš vašálaččaid

vuoitit mu ja illudit das.

Ale suova daid geat almmá siva haga

vašuhit mu,

beassat časkit čalmmi bilkidemiin.

₂₀Sii eai sártno ráfi,

muhto hutket behttosa

eatnama jaskes olbmuid vuostá.

₂₁Sii cagget njálmmi galljin

mu vuostá ja čurvot: “Aiddo muttát!”

Sii dadjet:

“Dehan de beasaimet oaidnit dán

iežamet čalmmiiguin!”

₂₂Hearrá, don leat oaidnán dán buot,

ale šat oro jávohaga!

Hearrá, ale leage mus guhkkin.

₂₃Čuožžil gozihit mu vuoigatvuođa!

Mu Ipmil ja Hearrá, jođit mu ášši.

₂₄Dubme mu rievttuid,

Hearrá, mu Ipmil,

ale suova mu vašálaččaid vuoitit.

₂₅Ale divtte sin dadjat

váimmusteaset:

“De manai nugo mii sávaimet!”

Ale divtte sin beassat dadjat:

“Mii leat njielastan su!”

₂₆Divtte daid geat illudit

mu lihkuhisvuođa dihte,

šaddat heahpanit ja bilkiduvvot.

Divtte daid geat čevllohallet

mu vuostá,

oažžut gárvuneaset gudnehisvuođa

ja heahpada.

₂₇Muhto vare dat geat sávvet

munnje vuoigatvuođa,

beasašedje ávvudit ja illudit.

Sárdnoset sii álo: “Stuoris lea Hearrá!

Son suovvá bálvaleaddjásis ráfi.”

₂₈Mu njuovčča sárdnu

du vanhurskkisvuođa,

rámida du geažos beaivvi.