Sálmmaid girji 42

₂Nugo sarvva áibbaša

golgi jogaža čáziide,

nu mu siellu áibbaša du, Ipmil.

₃Mu siellu goikaluvvá Ipmilii,

ealli Ipmilii.

Goas beasan boahtit tempelii,

goas loaiddastit

Ipmila muođuid ovdii?

₄Gatnjalat leat mu borramuš

ija beaivvi.

Olbmot jearahit mus álo:

“Gos lea du Ipmil?”

₅Mun dohppehalan morrašii

go muittašan

mo mun Veagalačča suodjalusas johten

Ipmila vissui illudemiin ja giitimiin

stuorra joavkku fárus

mii lei vádjoleamen doallat basiid.

₆Manne moraštat, mu siellu,

manne leat nu mášoheapme?

Vuordde Ipmila!

Velá oktii mun beasan giitit su,

Ipmila, iežan beasti.

₇Mu siellu morašta,

dan dihte mun jurddašan du

Jordana ja Hermona eatnamis,

Misarváris.

₈Čiekŋalas čuorvu čiekŋalassii

go du goržžit šávvet,

buot du siiggát ja bárut

márret mu badjel.

₉Beaivet Hearrá čájeha

iežas árbmugasvuođa,

ihkku mun lávllun su máidnuma

ja rohkadalan mu eallima Ipmila.

₁₀Mun cealkkán Ipmilii, mu báktái:

“Manne don leat vajáldahttán mu?

Manne mun ferten johtit morrašis

go vašálaš áŧesta mu?”

₁₁Mus manná čađa sivu

go mu vašálaččat hiddjidit mu,

go sii álo jearahit mus:

“Gos lea du Ipmil?”

₁₂Manne moraštat, mu siellu,

manne leat nu mášoheapme?

Vuordde Ipmila!

Velá oktii mun beasan giitit su,

Ipmila, iežan beasti.