Sálmmaid girji 43

₁Atte munnje vuoigatvuođa,

Ipmil, jođit mu ášši

oskkáldasmeahttun álbmoga vuostá.

Gájo mu behtolaš ja bahás olbmuin!

₂Don, Ipmil, leat mu suodji.

Manne leat hilgon mu?

Manne mun šattan moraštit,

go vašálaš áŧesta mu?

₃Vuolggat iežat čuovgasa ja duohtavuođa,

divtte daid láidet mu du bassi várrái,

ássanbáikásat,

₄nu ahte mun oaččun boahtit

du áltára ovdii,

du muođuid ovdii, Ipmil, mu illu ja ávvu,

ja rámidit du lyrain,

Ipmil, mu Ipmil!

₅Manne don moraštat, mu siellu,

manne leat nu mášoheapme?

Vuordde Ipmila!

Velá oktii mun beasan giitit su,

Ipmilan, mu beasti.