Sálmmaid girji 49

₂Gullet dán, buot álbmogat,

guldalehket, buot máilmmi ássit,

₃sihke heajut ja fámolaččat,

sihke riggát ja váivvášat!

₄Mu njálbmi sárdnu

viissisvuođa sániid,

mu jurdagat leat jierpmálaččat.

₅Mun guldalan viissisvuođa sániid,

mun čilgen árvádusaid

lyra čuojahemiin.

₆Manne mun galggašin ballat

bahás beivviin,

go behtolaččaid bahávuohta

birastahttá mu?

₇Sii dorvvastit opmodahkii

ja rámidit iežaset stuorra riggodaga.

₈Ii olmmoš sáhte lonistit vieljas,

ii son sáhte addit su ovddas

Ipmilii lonástusruđa.

₉Heakka lotnásat leat ilá divrasat,

dat báhcet agibeaivái mávssikeahttá.

₁₀Olmmoš ii sáhte eallit agálaččat

ja vealtat mannamis hávdái.

₁₁Son šaddá oaidnit ahte velá

viisátge jápmet

seammá láhkái go doavkkit

ja jierpmeheamit.

Sii guđđet opmodagaset earáide.

₁₂Hávdi šaddá sin ruoktun agálaččat,

sin orrunsadjin buolvvas bulvii,

vaikko sii eaiggádušše eatnamiid.

₁₃Buot hearvásvuođastis

olmmoš ii sáhte eallit agálaččat,

elliid láhkái songe duššá.

₁₄Nu geavvá jierpmehemiide

ja daidda geat jáhkket

sin sániide. Sela

₁₅Sii mannet vuolás

jábmiidáibmui dego sávzzat,

jápmin šaddá sin báimmanin.

Vuoigatlaččat ráđđejit sin

go iđedisguovssu badjána.

Sin hápmi billašuvvá

jábmiidáimmus.

₁₆Muhto Ipmil lonista mu,

son čoavdá mu

jábmiidáimmu fámus. Sela

₁₇Ale hirpmástuva

jos soamis riggu,

jos vallji lassána su dálus.

₁₈Go son jápmá,

de son ii oaččo mielde maidege,

riggodat ii čuovo su hávdái.

₁₉Son sáhttá máidnut iežas

lihkolažžan dán eallimis,

ja olbmot rámidit su

go son lea birgen bures.

₂₀Dattetge son manná

áhčiidis lusa,

geat eai goassege šat

oainne čuovgga.

₂₁Buot hearvásvuođastis

olmmoš lea jierpmeheapme,

elliid láhkái songe duššá.