Sálmmaid girji 50

Ipmil, Hearrá Ipmil, lea sárdnon,

son lea rávkan eatnama

beaivváža badjáneami rájes

dan luoitádeami rádjái.

₂Sionis, dievaslaš čábbás,

Ipmil almmustuvvá hearvásvuođastis.

₃Min Ipmil boahtá,

ii son oro jávohaga.

Duššadeaddji dolla

manná su ovddas,

su birra riđđuda sakka.

₄Son rávká almmi badjin,

son rávká eatnama

vai beassá dubmet iežas álbmoga.

₅“Čohkkejehket mu ovdii

oskkáldasaidan,

geat oaffariiguin leat dahkan muinna lihtu.”

₆Albmi gulaha

Ipmila vanhurskkisvuođa.

Son ieš lea duopmár. Sela

₇“Gula, álbmogan,

mun dáhtun sárdnut,

gula Israel, mun várren du.

Mun lean Ipmil, du Ipmil.

₈In mun cuiggot du

du njuovvanoaffariid dihte,

du boaldinoaffarat

leat álo mu ovddas.

₉In mun váldde vuovssáid du viesus

inge bohkáid du gárddiin,

₁₀dasgo mu leat buot meahcieallit,

buot fuođđut duháhiin váriin.

₁₁Mun dovddan buot almmi lottiid,

buot mii lihkada eatnama alde,

gullá munnje.

₁₂Jos mun livččen nealgumin,

de in mun muitalivčče dan dutnje,

dasgo mu lea eanan

ja buot mii dan deavdá.

₁₃Mungo borašin vuovssáid bierggu,

jugašin bohkáid vara?

₁₄Oaffaruša giitosa Ipmilii,

doala lohpádusaidat Alimussii.

₁₅Čuorvvo mu heahtebeaivvi,

de mun gájun du,

ja don máinnut mu.”

₁₆Muhto ipmilmeahttumii

Ipmil cealká:

“Mii vuoigatvuođaid dus lea

sárdnidit mu báhkkomiid,

mo duosttat váldit mu lihtu njálbmásat,

₁₇don gii vašuhat bagadusa

ja bálkestat mu sániid

sealggát duohkái?

₁₈Jos don oainnát suollaga,

de don searvvat suinna,

furrošeddjiiguin

don anát oktavuođa.

₁₉Don luoittát njálmmis bahávuođa,

du njuovčča botná behtolašvuođa.

₂₀Don sártnut bahá

iežat vielja vuostá,

bilkidat eatnát bártni.

₂₁Dakkáriid don dagat,

ja mungo galggašin orrut jávohaga?

Ale gátte ahte mun lean

du láhkásaš.

Muhto mun áiggun cuiggodit du

ja ráŋggáštit du.

₂₂Váldet dán vuhtii,

dii geat vajáldahttibehtet Ipmila!

Muđui mun gaikkodan din,

iige oktage leat gádjumin.

₂₃Dat gii oaffaruššá giitosa,

gudnejahttá mu.

Gii vádjola vuoigadis geainnu,

beassá oaidnit ahte Ipmil beastá.”