Sálmmaid girji 5

₂Hearrá, gula mu sániid,

fuomáš mu šuohkáhusaid!

₃Guldal go mun čuorvvun,

mu gonagas ja Ipmil,

mun rohkadalan du.

₄Hearrá, don gulat mu jiena iđedis,

árrat mun bijan áššán du ovdii

ja vuorddán.

₅Ipmil, don it gierdda

ipmilmeahttunvuođa.

Bahát eai beasa orrut du luhtte,

₆čeavlás olbmot eai oaččo

loaiddastit du čalmmiid ovdii,

don vašuhat vearredahkkiid.

₇Don duššadat gielástalliid, Hearrá,

sorbmejeddjiid ja behtolaččaid

don fasttášat.

₈Muhto du stuorra árbmugasvuođa dihte

mun oaččun boahtit du tempelii.

Mun gudnejahtán du

ja luoitádan eatnamii,

jorgalan muođuid du bassi tempela guvlui.

₉Hearrá, láide mu

oskkáldasvuođastat,

vai vašálaččat eai olat mu,

daga geinnot dássidin mu ovdii.

₁₀Sin njálmmis ii leat duohtavuohta,

sin siskkildasas lea billašupmi.

Sin čotta lea rabas hávdi,

sis leat behtolaš sánit

njuokčama alde.

₁₁Ipmil, dubme sin sivalažžan,

njeaidde sin

sin bahás áigumušaid dihte.

Áje sin eret

sin eatnat suttuid dihte,

du vuostáhan sii leat stuibmidan.

₁₂Muhto illudehkoset buohkat

geat dorvvastit dutnje,

ávvudehkoset sii agálaš áigái.

Don suodjalat sin,

ja dat geat ráhkistit du nama,

ávvudit dus.

₁₃Don, Hearrá,

buressivdnidat vanhurskása,

du buorrevuohta gokčá su

galbba láhkái.