Sálmmaid girji 58

₂Fámolaččat, sárdnubehtetgo

dii duođaid riekta?

Dubmebehtetgo dii olbmuid

vuoigatlaččat?

₃Ehpet! Mielaeavttus

dii dahkabehtet veriid eatnama alde,

jalgebehtet geainnu veahkaváldái.

₄Ipmilmeahttumat leat čádjidan

riegádeami rájes,

gitta eatniset goaŧu rájes

gielástallit leat čádjádusas.

₅Sin mirko lea dego gearbmašmirko,

sii notket beljiid ja

leat dego bealjehis gearpmaš

₆mii ii gula

gearpmašlabmu jiena,

ii velá čeahpimus labmuge jiena.

₇Ipmil, cuvke bániid sin njálmmis,

Hearrá, molle ledjoniid bániid!

₈Divtte sin jávkat dego čáhci

mii golgá eret,

nugo rássi mii duolmmahallá

ja goldná.

₉Divtte sidjiide geavvat dego riipui

mii suddá njivlin njoamudettiin,

divtte sin šaddat cuovkanan

ogi láhkásažžan

mii ii goassege oaidnán beaivváža.

₁₀Dego riđđu son bossu sin eret,

ovdal go sii levvet

nugo bastilislánját.

₁₁Muhto vuoigatlaš illuda

go oaidná ahte son beassá mávssahit.

Son beassá bassat julggiidis

ipmilmeahttumiid varas.

₁₂Dalle olbmot dadjet:

“Vanhurskkis oažžu bálkkás.

Duođaid, lea Ipmil guhte dubme

eatnama alde.”