Sálmmaid girji 60

₃Ipmil, don hilgot min

ja cuvkejit min,

don ledjet moaris.

Čuoččáldahte min fasttain.

₄Don doarggistahttet eatnama

ja diktet dan ráhkat.

Divo dan ráhkamiid,

dasgo dat lea duššamin.

₅Don diktet iežat álbmoga muosáhit

garra áiggi,

jugahit midjiide viinni

nu ahte mii suoibbuimet.

₆Muhto daidda geat ballet dus,

don leat ceggen leavgga,

dan lusa sii sáhttet báhtarit

dávggis. Sela

₇Beastte min olgeš gieđainat

ja vástit midjiide,

vai dat geaid don ráhkistat,

gáddjojuvvošedje.

₈Ipmil lea sárdnon bassibáikkistis:

Ávuin mun juogadan Sikema

ja mihtidan Sukkotleagi.

₉Munnje gullá Gilead ja Manasse,

Efraim lea mu oaivesuodji,

Juda lea mu ráđđensoabbi.

₁₀Moab lea mu basadanlihtti,

Edomii mun bálkestan

gápmagiiddán.

Filistea vuostá mun bajidan

soahtečuorvasa.

₁₁Gii doalvu mu nana gávpogii,

gii láide mu Edomii?

₁₂Itgo don Ipmil, hilgon min,

itge vuolgán min soahteveagaiguin?

₁₃Veahket min vašálačča vuostá.

Dasgo olbmuid veahkis ii leat ávki.

₁₄Ipmila fámuin mii dahkat

stuorra daguid,

son duolbmá min vašálaččaid.