Sálmmaid girji 61

₂Gula mu váidalančuorvasa, Ipmil,

guldal mu rohkadusa!

₃Eatnama ravddas

mun čuorvvun du

go mu váibmu vuoimmehuvvá.

Doalvvo mu bávtti ala

ja atte munnje dorvvu.

₄Don leat leamaš

mu báhtaransadji,

nana toardna vašálačča vuostá.

₅Mun dáhtun ássat

du goađis álelassii

ja gávdnat suoji du soajáid vuolde.

Sela

₆Ipmil, don leat gullan

mu lohpádusaid,

don leat addán munnje árbbi

daiguin geat ballet du namas.

₇Don lasihat gonagassii

eallinjagiid,

son ráđđe buolvvas bulvii.

₈Vare su truvdnu bisošii agálaččat

du muođuid ovddas,

vare du árbmu ja oskkáldasvuohta

várjalivččii su!

₉Dalle mun lávllun máidnuma

du nammii agálaččat

ja ollašuhtán lohpádusaidan

beaivvis beaivái.