Sálmmaid girji 62

₂Aivvefal Ipmila ovddas

mu siellu gávdná ráfi,

sus boahtá mu bestojupmi.

₃Aivvefal son lea mu bákti

ja mu bestojupmi, son lea mu ladni,

in mun suoibbo.

₄Man guhká dii áigubehtet

fallehit ovtta olbmá ja goddit su,

norddastit su vuolás dego

állanaddi seainni

dahje gahčči muvrra?

₅Sii ráđđádallet gaskaneaset

vai besset norddastit mu vuolás.

Sii ráhkistit beahttima,

njálmmiin sii gal buressivdnidit,

muhto váimmus sii garuhit.

Sela

₆Aivvefal Ipmila ovddas

mu siellu gávdná ráfi,

son addá munnje doaivvu.

₇Aivvefal son lea mu bákti

ja mu bestojupmi,

son lea mu ladni, in mun suoibbo.

₈Ipmilis boahtá mu bestojupmi

ja gudni.

Son lea mu nana bákti,

son lea mu dorvu.

₉Olbmot, dorvvastehket álelassii Ipmilii,

buktet su ovdii buot

mii deaddá váimmu.

Ipmil lea min dorvu. Sela

₁₀Olmmoš lea dušše vuoiŋŋanas,

olbmománát eai leat mahkkege.

Veavttas sii eai olu deatte,

sii leat geahppaseappot go áibmu.

₁₁Allet dorvvas veahkaváldái,

allet duššiid dihte bija doaivvu

rieviduvvon opmodahkii.

Vaikko opmodat lassána,

de allet dorvvas dasa.

₁₂Ovtta geardde Ipmil lea sárdnon,

guovtte geardde

lean dan gullan:

Fápmu gullá Ipmilii,

₁₃don, Hearrá, leat oskkáldas.

Don mávssát juohkehažžii

su daguid mielde.