Sálmmaid girji 63

₂Ipmil, mu Ipmil,

du mun ozan.

Mu siellu goikaluvvá dutnje,

mu rumaš ohcala du

guorba meahcis gos ii leat čáhci.

₃Bassibáikkis mun beasan geahččat du,

oaidnit du fámu ja hearvásvuođa.

₄Du árbmu lea buoret go eallin.

Mu baksamat rámidit du.

₅Mun máinnun du

nu guhká go ealán,

mun lokten gieđaid du guvlui.

₆Dalle mu siellu gallehuvvo

dego buoiddes borramušain,

ja mun rámidan du

ávvudeaddji baksamiiguin.

₇Mun muittán du

go veallán seaŋggas,

mun jurddašan du idjagohcinvuorus.

₈Dasgo don leat leamaš

mu veahkki,

du soajáid suoivanis mun beasan ávvudit.

₉Mun goattan dutnje,

du olgeš giehta doarjala mu.

₁₀Muhto dat geat bivdet

mu heakka,

mannet eatnama čiekŋalassii.

₁₁Sii addojuvvojit miehki háldui,

sii šaddet riebaniid sálašin.

₁₂Muhto gonagas illuda Ipmilis.

Buohkat geat vurdnot Ipmila nammii,

besset ávvudit,

muhto gielástalliid njálbmi

dahppojuvvo.