Sálmmaid girji 64

₂Ipmil, gula mu jiena

go mun váidalan,

várjal mu heakka

go vašálaš suorggaha.

₃Čiega mu baháid juonain,

vearredahkkiid šlámaideaddji

joavkkus.

₄Sii sadjet njuokčameaset bastilin

dego miehkki,

báhčigohtet bahča sániideasetguin

nugo njuolaiguin.

₅Fáhkka sii báhčet čihkosis vigiheami,

báhčet eaige bala.

₆Sii giktalit guhtet guimmiideaset

dahkat bahá,

sii muitalit mo áigot bidjat čiegus gielaid

ja dadjet: “Ii dan oainne oktage.”

₇Sii hutket baháid ja dadjet:

“Mii leat gárvásat,

jurdda lea hutkojuvvon.”

Čieŋal lea olbmo váibmu.

₈Muhto Ipmil báhčá njuolaidis

sin njeaiga,

fáhkkestaga sii deaivvahallet.

₉Sin iežaset njuovčča

jorralahttá sin.

Buohkat geat oidnet sin,

hirpmástuvvet.

₁₀Buot olbmot suorganit,

sii gulahit maid Ipmil lea dahkan

ja guorahallet Ipmila daguid.

₁₁Vanhurskkis illuda Hearrás

ja ohcá dorvvu su luhtte.

Buot vuoiggalaččat

máidnot iežaset lihkolažžan.