Sálmmaid girji 66

Bajit máidnunčuorvasa Ipmilii,

oppa eanan,

₂lávllo sutnje rámádusa,

gudnejahte su máidnumiin!

₃Dadjet Ipmilii:

Hirbmatlaččat leat du dagut!

Du vašálaččat dohkkestuvvet dutnje

du veagalaš fámu dihte.

₄Oppa eanan gopmirda ja máidnu du,

lávlu rámádusa du nammii. Sela

₅Bohtet geahččat maid Ipmil lea dahkan!

Son lea dahkan olbmuide

hirbmatlaš daguid.

₆Son nuppástuhtii meara

goikeeanamin,

goikejulggiid sii rasttildedje eanu.

Dan dihte mii oažžut illudit su siste.

₇Stuorra válddiin

son ráđđe agálaččat,

su čalmmit gozihit álbmogiid.

Vuostehágolaččat

eai oaččo čuožžilit. Sela

₈Máidnot min Ipmila, buot álbmogat,

diktet ávvulávlaga čuodjat!

₉Son bisuha min heakkas

son ii divtte min julggiid suoibut.

₁₀Don, Ipmil, leat geahččalan min,

don leat buhtistan min

nugo olmmoš čilge silbba.

₁₁Don diktet min darvánit fierbmái,

don bidjet min guoddit noađi.

₁₂Don luitet olbmuid riidet

min oaivvi badjel,

mii šattaimet mannat dola

ja čázi čađa,

muhto don buktet min valljivuhtii.

₁₃Mun buvttán boaldinoaffara

du tempelii,

mun ollašuhtán dutnje lohpádusaidan

₁₄maid mu baksamat celke,

maid mu njálbmi sártnui

go mun ledjen heađis.

₁₅Mun buvttán dutnje buoiduduvvon

omiid boaldinoaffarin

ja divttán vierccaid boaldinsuova badjánit,

mun oaffarušan vuovssáid

ja bohkáid. Sela

₁₆Bohtet gullat, buohkat geat

ballabehtet Ipmilis,

de mun muitalan

maid son lea dahkan munnje.

₁₇Mun čurvon sutnje,

mu njuokčama alde

lei juo máidnunlávlla.

₁₈Jos mus livččii leamaš

vearrivuohta mielas,

de Hearrá ii livčče gullan mu.

₁₉Muhto Ipmil guldalii,

son gulai mu rohkadusa jiena.

₂₀Máidnojuvvon lehkos Ipmil!

Son ii hilgon mu rohkadusa

iige biehttalan mus iežas árpmu.