Sálmmaid girji 71

₁Hearrá, dutnje mun dorvvastan,

ale goassege hilggo mu.

₂Don leat oskkáldas,

gájo mu ja beastte mu!

Jorgal bealji mu beallái ja veahket mu.

₃Leage munnje bákti man suodjái

sáhtán báhtarit,

ladni gos gávnnan bestojumi.

Don leat mu bákti ja mu ladni.

₄Ipmil, beastte mu baháid gieđas,

gájo mu ipmilmeahttuma

ja veahkaválddálačča válddis.

₅Don leat mu doaivu,

Hearrá, mu Ipmil,

nuorravuođa rájes mun lean

dorvvastan dutnje, Hearrá.

₆Riegádeapmán rájes leat don leamaš

mu doarjja,

eadnán goaŧu rájes mu givrodat.

Du mun máinnun álelassii.

₇Eatnagiidda mun lean šaddan mearkan,

muhto don leat mu nana dorvu.

₈Mu njálmmi dievva

lea du rámádus,

geažos beaivvi mun máinnun

du hearvásvuođa.

₉Ale hilggo mu

go lean boarásmuvvan,

ale guođe mu go mu fápmu nohká.

₁₀Dat geat vuđgŋet mu heakka,

ráđđádallet gaskaneaset,

mu vašálaččat dadjet:

₁₁ “Ipmil lea hilgon su.

Doarridehket ja dohppejehket su,

ii su oktage gájo.”

₁₂Ipmil, ale leage guhkkin!

Mu Ipmil, gáhča veahkehit mu.

₁₃Šaddoset heahpadii

ja duššoset dat geat uhkidit mu,

deaividehkos heahpat ja hiddjádus daid

geat dáhttot vahágahttit mu!

₁₄Muhto mus lea álelassii doaivu,

mun lávllun álo du rámádusa.

₁₅Mu njálbmi muitala

du oskkáldasvuođa

ja álelassii du veahki valljivuođa,

vaikko in goassege ádde dan ollásit.

₁₆Hearrá, mu Ipmil, mun muitalan

du stuorra daguid,

rámidan oskkáldasvuođa

maid aivvefal don veaját čájehit.

₁₇Ipmil, don oahpahit mu

juo dalle go ledjen nuorra,

ja vel ain mun muitalan du oavdudaguid.

₁₈Ale hilggo mu, Ipmil,

dál go lean boaris ja čuorgat.

Divtte mu gulahit du fámu

boahtti buolvvaide.

₁₉Ipmil, du fápmu

ja oskkáldasvuohta ollá albmái.

Du dagut leat stuorrát, Ipmil,

gii lea du veardásaš?

₂₀Don leat addán mu oaidnit

stuorra áŧestusaid

ja ollu oasehisvuođa,

muhto don áhpásmahtát mu fastain

ja loktet mu

eatnama čiekŋalasain.

₂₁Don lasihat mu gudni,

don attát fas munnje jeđđehusa.

₂₂Dalle mun rámidan du oskkáldasvuođa

hárpačuojahemiin, Ipmil,

mun máinnun du lyra šuoŋaiguin,

Israela Bassi.

₂₃Mu baksamat ávvudit

go mun čuojahan du gudnin,

mu siellu illuda danin go

don lonistit mu.

₂₄Heaittikeahttá mu njuovčča

muitala du vuoigatlašvuođa,

muhto dat geat sávvet munnje bahá,

šaddet heahpanit ja bilkiduvvot.