Sálmmaid girji 75

₂Mii giitit du, Ipmil,

mii máidnut du

ja čuorvut du nama,

mii muitalit du oavdudaguid.

₃Mun, Hearrá, mearridan áiggi,

mun dubmen riekta.

₄Eanan ja buohkat geat ásset das,

doarggistit,

muhto mun nannen

dan vuođđobácciid. Sela

₅Mun cealkkán čeavlás olbmuide:

“Allet čeavllástala!”

ja ipmilmeahttumiidda:

“Allet alit iežadet,

₆allet sártno roavvásit

ja ceakkoniskkiid.”

₇Ii nuortan iige oarjin,

ii velá meahcisge

boađe oktage alidit sin.

₈Go Ipmil dubme,

de ovtta son vuolida, nuppigis alida.

₉Hearrá gieđas lea cearkki dievva

sorpon, máisttagahtton viidni.

Son leike viinni

buot eatnama ipmilmeahttumiidda,

ja sii fertejit juhkat dan,

gurret botni ráje.

₁₀Muhto mun máinnun Hearrá

agibeaivvi,

lávllun giitosa Jakoba Ipmilii.

₁₁Son cuvke ipmilmeahttumiid fámu,

muhto vuoigatlaš aliduvvo.