Sálmmaid girji 79

Ipmil, du eatnamii

leat báhkken vieris álbmogat,

dat leat dahkan du bassi tempela

buhtismeahttumin

ja rievdadan Jerusalema čievračopman.

₂Du bálvaleddjiid rupmašiid

sii leat addán almmi lottiide biebmun,

du oskkáldasaid oačči meahcispiriide.

₃Birra Jerusalema sii leat

golggahan sin vara dego čázi,

iige oktage leat hávdádan sin.

₄Min ránnját bilkidit min,

dat geat ásset min birra, hiddjidit min.

₅Man guhká, Hearrá, don leat moaris,

man guhká du áŋgirvuohta buollá dego dolla?

₆Golggat suhtot daid álbmogiid badjelii

mat eai dovdda du,

daid riikkaid badjelii

mat eai dorvvas du nammii.

₇Dasgo sii leat loahpahan Jakoba

ja dahkan su eatnama ávdimin.

₈Ale logahala midjiide

min máddariid suttuid,

doama min ovddal

váibmoláđisvuođainat,

dasgo min vártnuhisvuohta lea stuoris.

₉Veahket min, Ipmil, min beasti,

vai du namma gudnejahttojuvvošii.

Lonis min ja atte midjiide

min suttuid ándagassii iežat nama dihte.

₁₀Manne galggašedje álbmogat

beassat dadjat:

“Gos lea sin Ipmil?”

Divtte min oaidnit, divtte álbmogiid

fuomášit, mo don mávssahat

bálvaleddjiidat vara.

₁₁Gula fáŋggaid šuohkkima,

čoavdde fámolaš gieđainat daid

geat leat dubmejuvvon jápmit.

₁₂Mávsse min ránnjáide

čiežageardásaččat

dan bilkku mainna sii leat

hiddjidan du, Hearrá.

₁₃De mii, du álbmot, du ealu sávzzat,

giitit du agálaččat,

rámidit du buolvvas bulvii.