Sálmmaid girji 90

Hearrá, don leat leamaš

min dorvu buolvvas bulvii.

₂Juo ovdal go várit riegádedje,

ovdal go eanan ja máilbmi šadde,

don ledjet.

Ipmil, agálašvuođas agálašvuhtii

don leat.

₃Don divttát olbmuid šaddat

fas muoldan ja cealkkát:

“Máhccet muldii, olbmománát.”

₄Duhát jagi du čalmmiin

leat dego ievttáš beaivi

mii manai meattá,

nugo idjagohcinvuorru.

₅Don sihkastat olbmuid eret,

sii leat dego iđitnagir.

Sii jávket nugo rássi;

₆vaikko dat liđiida iđđedis,

de eahkedis dat goldná ja goiká.

₇Du suhttu sotnada min,

mii suorganit go don moaráhuvat.

₈Don válddát min vearredaguid

čalmmiidat ovdii,

min čiegus suttuid muođuidat čuovgasii.

₉Buot min beaivvit vásset

du moari vuolde,

min eallima jagit jávket dego šuohkanas.

₁₀Min eallináigi lea čiežalogi jagi

dahje gávccilogi, jos lea gievravuohta.

Dat leat dušše váivi ja rahčan,

johtilit dat leat gollan,

ja mii girdilit eret.

₁₁Gii dovdá du moari fámu,

gii ipmirda dan ja ballá dus?

₁₂Oahpat min lohkat beivviideamet riekta,

vai mii oažžut viissis váimmu.

₁₃Jorgal min beallái, Hearrá!

Man guhká don ádjánat?

Árpmit min, iežat bálvaleddjiid!

₁₄Gallet min árpmuinat juohke iđida,

vai mii sáhttit leat ilus

buot beivviideamet.

₁₅Illudahte min seammá guhká

go leat váivvidan min,

nu galle jagi go mii leat gillán.

₁₆Divtte iežat bálvaleddjiid

oaidnit du stuorra daguid,

divtte min mánáid oaidnit

du hearvásvuođa.

₁₇Hearrá, divtte min dovdat

du láđisvuođa.

Suova midjiide menestuvvat

buot maid mii dahkat.