Sálmmaid girji 89

₂Mun lávllun ja máinnun álelassii

Hearrá oskkáldasvuođa.

Mun gulahan du oskkáldasvuođa

buolvvas bulvii:

₃Mun cealkkán: Du árbmu

bissu nanusin agálaš áigái,

du oskkáldasvuohta

bissu nanusin almmis.

₄“Mun, Hearrá, lean dahkan lihtu

suinna gean lean válljen,

mun lean vurdnon

bálvaleaddjásan Davidii:

₅Du soga mun bisuhan agálaš áigái,

du truvdnu bissu nanusin

buolvvas bulvii.” Sela

₆Hearrá, almmit rámidit du oavdduid,

basiid čoakkalmas du oskkáldasvuođa.

₇Gii allagasas livččii Hearrá veardásaš,

guhtemuš ipmiliid bártniin

Hearrá láhkásaš?

₈Stuoris ja hirpmus lea Ipmil

basiid čoakkalmasas,

suorggatlaš buohkaide geat leat su birra.

₉Hearrá, Almmiveagaid Ipmil,

gii lea gievra nugo don?

Hearrá, don leat fámolaš,

oskkáldasvuohta birastahttá du.

₁₀Don ráđđet meara goargatvuođa,

don jaskkodahtát báruid,

go dat badjánit.

₁₁Don cuvkejit Rahaba,

časket dan jámas,

biđgejit vašálaččaidat gievrras gieđainat.

₁₂Du lea albmi ja du lea eanan,

don leat vuođđudan máilmmi

ja buot mii das lea.

₁₃Don leat sivdnidan davi ja luli,

Tabor ja Hermon rámidit du nama.

₁₄Du giehta lea fámolaš,

du bajiduvvon olgeš giehta lea gievra.

₁₅Vanhurskkisvuohta ja vuoigatvuohta

leat du truvnnu vuođđudus,

árbmu ja oskkáldasvuohta

du bálvaleaddjit.

₁₆Ávdugas dat álbmot

mii máhttá máidnut du, Hearrá!

Dat álbmot beassá vádjolit

du muođuid čuovgasis.

₁₇Beaivvis beaivái sii illudit du namas

ja ávvudit du vanhurskkisvuođas.

₁₈Don leat sin hearvás givrodat,

du buorrevuođas mii oažžut fámu.

₁₉Hearrá lea min galba,

Israela Bassi min gonagas!

₂₀Oktii don sárdnot oainnáhusas

iežat oskkáldasaide:

“Mun lean čuoččáldahttán

nuorra olbmá álbmoga gaskkas,

lean bidjan kruvnnu sáŋgára oaivái.

₂₁Mun lean gávdnan Davida,

bálvaleaddján,

ja vuoidan su bassi oljjuin.

₂₂Mu fápmu nanne su,

mu giehta lea sus doarjjan.

₂₃Vašálaš ii su vuoitte,

veahkaválddálaš ii su soardde.

₂₄Su vuostálastiid mun cuvken su ovdii,

mun časkkán buohkaid

geat vašuhit su.

₂₅Mu oskkáldasvuohta

ja buorrevuohta lea suinna,

mu nammii su fápmu šaddá stuorisin.

₂₆Mun bijan meara su gieđa vuollái,

attán eanuid su olgeš gihtii.

₂₇Son dadjá munnje:

‘Don leat mu áhčči,

mu Ipmil ja mu bestojumi bákti’.

₂₈Son lea mu vuosttašriegádeaddji,

alimus eatnama gonagasain.

₂₉Mun lean sutnje oskkáldas

agálaš áigái,

mu lihttu suinna bissu nanusin.

₃₀Mun bisuhan su soga álelassii,

su truvnnu nu guhká go albmi lea.

₃₁Jos su bártnit hilgot mu lága

eaige doahttal mu báhkkomiid,

₃₂jos sii rihkkot mu lágaid

eaige doala mu gohččumiid,

₃₃dalle mun ráŋggáštan sin

rissiin sin rihkkumiid geažil,

huškkun sin sin vearredaguid dihte.

₃₄Muhto árpmu

mun in váldde sus eret,

in beahte iežan oskkáldasvuođa.

₃₅Mun in rihko lihtton

inge rievdat dan maid lean sárdnon.

₃₆Oktii mun vurdnon

bassivuohtan bokte: In beahte Davida.

₃₇Su sohka bissu agálaš áigái,

su truvdnu dego beaivváš mu ovddas,

₃₈dat bissu agálaččat dego mánnu,

dat oskkáldas duođašteaddji

allagasas.” Sela

₃₉Almmatge don nordadit eret

su gean leat vuoidan, hilgot su moaristat.

₄₀Don rihkkot lihtu

maid ledjet dahkan bálvaleddjiinat,

heahppášuhttet su kruvnnu

ja dulbmet dan muldii.

₄₁Don gaikot eatnamii buot su muvrraid,

dahket su ladniid čievračopman.

₄₂Dál buohkat geat mannet meattá,

rievidit su,

su ránnját atnet su bilkun.

₄₃Don addet su vašálaččaide fámu,

illudahttet buot su vuostálastiid.

₄₄Su bastilis miehki don jorgalit,

it dorjon su soađis.

₄₅Don loahpahit su hearvásvuođa,

njeidet eatnamii su truvnnu.

₄₆Don oanidit su nuorravuođa beivviid,

gokčet su heahpadiin. Sela

₄₇Hearrá, man guhká?

Čiehkádatgo don agibeaivái?

Man guhká du moarri buollá dego dolla?

₄₈Muitte man oanehaš lea mu eallin,

man nohkavažžan don leat

sivdnidan buot olbmuid!

₄₉Gii olbmuid eallá

iige oainne jápmima,

gii beastá iežas eallima

jábmiidáimmu válddis? Sela

₅₀Hearrá, gos lea du oskkáldasvuohta,

gos du lohpádusat

maid váliin vurdnot Davidii?

₅₁Hearrá, ale vajálduhte

mo du bálvaleaddji heahppášuhttojuvvo!

Mun šattan gierdat álbmogiid bilkku.

₅₂Hearrá, geahča mo

du vašálaččat hiddjidit!

Sii hiddjidit su gean don leat vuoidan,

sii bilkidit su vuorbbi.

₅₃Máidnojuvvon lehkos Hearrá

agálaš áigái!

Amen, amen.