Sálmmaid girji 92

₂Buorre lea rámidit Hearrá,

lávlut máidnuma du nammii, Alimus.

₃Buorre lea gulahit

du buorrevuođa iđedis,

juohke ija du oskkáldasvuođa

₄lyra šuoŋaiguin,

logisuonat hárppa čuojahemiin.

₅Hearrá, don illudahtát mu daguidatguin,

mun rámidan du gieđaid daguid.

₆Man stuorrát leat du dagut, Hearrá,

man čiekŋalat du jurdagat!

₇Jierpmehis olmmái ii dan ipmir,

jalla ii dan ádde.

₈Vaikko ipmilmeahttumat

šaddet dego rásit

ja buot vearredahkkit liđiidit,

de sii almmatge duššet, jávket agálaččat.

₉Don, Hearrá, leat alimus agálaš áigái.

₁₀Muhto du vašálaččat duššet, Hearrá,

buot vearredahkkit bieđganit.

₁₁Muhto mu givrodat badjána

dego meahcivuovssá čoarvi,

don vuoiddat mu varas oljjuin.

₁₂Mun beasan oaidnit

mo mu vašálaččat gahččet,

gullat mo bahás falleheaddjit duššet.

₁₃Vanhurskásat bohciidit nugo pálmmat,

sii šaddet allagin

dego Libanona sederat.

₁₄Sii leat gilvojuvvon Hearrá vissui,

sii liđiidit min Ipmila ovdašiljuin.

₁₅Velá boarisinge sii šaddadit šaddosiid,

leat šaddilat ja ruotnasat

₁₆ja muitalit Hearrá vuoigatlašvuođa.

Hearrá lea mu bákti,

sus ii leat mihkkege vearrivuođaid.