Sálmmaid girji 95

₁Bohtet, ávvudehkot Hearrá,

máidnot ja rámidehkot

min bestojumi bávtti!

₂Loaiddastehkot

su muođuid ovdii giitosiin,

rámidehkot su lávlumiin ja čuojahemiin!

₃Hearrá lea stuorra Ipmil,

buot ipmiliid alla gonagas.

₄Sus lea eatnama čiekŋalas gieđas,

váriid čohkat gullet sutnje.

₅Mearra lea su,

son lea sivdnidan dan,

su gieđat leat hábmen goikása.

₆Bohtet, luoitádehkot eatnamii,

sodjalahttot čippiid Hearrá,

min sivdnideaddji, ovdii.

₇Son lea min Ipmil

ja mii leat su álbmot,

dat eallu maid son geahččá.

Vare dii odne guldalivččiidet su jiena!

₈“Allet buoššut váimmu

dego Meriba luhtte,

nugo meahcis Massa guoras dan beaivvi

₉go din áhčit geahččaledje mu.

Sii geahččaledje mu

vaikko ledje oaidnán

maid mun ledjen dahkan.

₁₀Njealljelogi jagi mun fasttášin dan soga,

danin go mun oidnen mo sii čádjidit,

go eai dovdan mu geainnuid.

₁₁Dalle mun vurdnon moaristan:

‘Sii eai goassege beasa

dan vuoiŋŋadanbáikái

maid mun lean sidjiide lohpidan.’”