Almmustus 10

₁De mun oidnen fas eará fámolaš eŋgela boahtimin vuolás almmis. Sus lei gárvun balva, ja su oaivvi birra lei arvedávgi, su ámadadju lei dego beaivváš ja su juolggit dego dollabáccit. ₂Sus lei gieđas uhca rabastuvvon girjegeroš. Son bijai olgeš juolggi ábi ala ja gurut juolggi eatnama ala ₃ja čuorvvui alla jienain, dego ledjon livččii čergon. Go son lei čurvon, de sárdno dat čieža bajánjiena. ₄Go dat čieža bajánjiena ledje sárdnon, de mun áigon čállit, muhto dalle mun gullen almmis jiena mii celkkii: “Seailit dan maid dat čieža bajána sárdno, alege čále dan.”

₅Eŋgel gean mun oidnen čuožžumin ábi ja eatnama alde, loktii olgeš gieđa almmi guvlui ₆ja vuortnui su bokte guhte eallá álo ja agálaččat, su guhte lea sivdnidan almmi, eatnama ja ábi ja buot mii dain lea: “Áigi ii šat leat. ₇Go boahtá beaivi go čihččet eŋgel bajida dorvves ja bossu, de dalle Ipmila čiegus áigumuš lea ollašuhttojuvvon, nugo son lea almmuhan bálvaleddjiidasas profehtaide.”

₈Jietna maid mun ledjen gullan almmis, sártnui fas munnje: “Mana dan eŋgela lusa gii čuožžu ábi ja eatnama alde, ja váldde rabastuvvon girjegeroža mii sus lea gieđas.” ₉Mun mannen eŋgela lusa ja sihten su addit munnje girjegeroža. Son celkkii munnje: “Váldde ja bora dan. Dat bávččastahttá du čoavjjis, muhto du njálmmis dat lea njálggat dego honnet.” ₁₀Mun válden eŋgela gieđas girjegeroža ja borren dan. Mu njálmmis dat lei njálggat dego honnet, muhto go mun ledjen dan borran, de mun dovden čoavjjis bákčasa. ₁₁Munnje celkojuvvui: “Don fertet fastain profehtastallat mo geavvá máilmmi álbmogiidda, gielaide ja gonagasaide.”