Almmustus 14

₁De mun oidnen dán: Láppis čuoččui Sionváris, ja oktan Lábbáin ledje čuođinjealljeloginjealljeduhát olbmo geaid gállui lei čállojuvvon su namma ja su Áhči namma. ₂Ja mun gullen almmis jiena mii lei dego eatnat čáziid márra dahje dego garra bajána jupma. Jietna maid mun gullen, lei maiddái hárpačuojaheddjiid čuojaheami láhkásaš. ₃Truvnnu ja dan njealji sivdnádusa ja vuorrasiid ovddas sii lávlo ođđa lávlaga maid ii oktage sáhttán oahppat earret dan čuođinjealljelogijealljeduhát olbmo geat leat ostojuvvon eatnamis. ₄Sii eai leat nuoskkidan iežaset nissoniiguin muhto leat buhttásat dego nieiddat, ja sii čuvvot Lábbá gosa ihkinassii son manná. Sii leat ostojuvvon olbmuid gaskkas álgošaddun Ipmilii ja Lábbái. ₅Sin njálmmis ii leat behtolašvuohta, sii leat láitemeahttumat.

₆Ja mun oidnen nuppi eará eŋgela gii girddii allin gasku almmi. Su bargun lei gulahit agálaš evangeliuma eatnama ássiide, buot álbmogiidda, čearddaide, gielaide ja eatnamiidda. ₇Son gulahii alla jienain: “Ballet Ipmilis ja addet sutnje gudni, danin go su duomu áigi lea boahtán. Rohkadallet su gii lea sivdnidan almmi, eatnama, ábi ja čáhceádjagiid.”

₈De bođii velá nubbi eŋgel, gii celkkii: “Gahččan, gahččan lea stuorra Babylon mii fuorrávuođainis lea addán buot álbmogiidda juhkat moari viinni.”

₉Sudno maŋis bođii goalmmát eŋgel, gii celkkii alla jienain: “Jos muhtin rohkadallá beađu ja dan gova ja váldá gállosis dahje giehtasis dan mearkka, ₁₀de son maiddái juhká Ipmila moari viinni mii láivutkeahttájin lea leikejuvvon Ipmila moari gerrii, ja son givssiduvvo dolas ja riššas bassi eŋgeliid ja Lábbá ovddas. ₁₁Dolas mii olbmuid givssida, badjána suovva álo ja agálaččat. Sis ii leat vuoiŋŋadus ii ihkku iige beaivet, ii dain geat rohkadallet beađu ja dan gova, iige ovttasge gii váldá beađu nama iežas mearkan.” ₁₂Dás adnojuvvo bassi olbmuid gierdavašvuohta, daid geat dollet Ipmila báhkkomiid ja oskot Jesusii.

₁₃Mun gullen almmis jiena mii celkkii: “Čále: Ávdugasat dat geat dás maŋás jápmet Hearrás. Vuoigŋa cealká: Sii besset vuoiŋŋastit bargguineaset, danne go sin dagut čuvvot sin.”

₁₄Ja mun oidnen dán: Lei vilges balva, ja balvva alde čohkkái muhtun gii lei olbmobártni láhkásaš, ja su oaivvis lei gollekruvdnu ja gieđas bastilis sirpe. ₁₅Tempelis bođii nubbi eará eŋgel gii čuorvvui alla jienain dasa gii lei čohkkámin balvva alde: “Váldde iežat sirppe ja čuohpa, dál lea láddjenáigi. Eatnama šaddu lea láddan.” ₁₆Dalle dat gii lei čohkkámin balvva alde, luittii sirppe boahtit eatnama ala, ja eatnama šaddu čuhppojuvvui. ₁₇Almmi tempelis bođii muhtun eará eŋgel, ja sus maiddái lei bastilis sirpe. ₁₈Maiddái áltáris bođii eŋgel, dat geas lei váldi ráđđet dola, ja son čuorvvui alla jienain dan eŋgelii geas lei bastilis sirpe: “Váldde iežat bastilis sirppe ja čuohpa eatnama viidnegárddi šaddosiid; dan viidnemuorjjit leat láddan.” ₁₉Ja eŋgel luittii sirppe boahtit eatnama ala, čuohpai eatnama viidnegárddi šaddosiid ja suhppii daid Ipmila moari stuorra viidnebohčingárrái. ₂₀Viidnemuorjjit dulbmojuvvojedje gáris gávpoga olggobealde, ja das golggai varra nu ahte velá duhátguhttačuođi stadia duohken dat olii gitta heasttaid njálbmeruvddiid rádjái.