Allalávlla 1

₂Cummástallos son mu

njálmmis cummáiguin!

Du ráhkisvuohta lea buoret go viidni,

₃du vuoidasiid hádja lea hávskái!

Du namma lea dego

fiidnámus vuoidanolju,

danne nieiddat ráhkistit du.

₄Váldde mu gihtii, viehkku!

Doalvvo mu gámmárasat, gonagas!

Mii ávvudit, mii illudit du dihte,

mii rámidit du ráhkisvuođa

eambbo go viinni.

Rievttuid sii ráhkistit du.

₅Mun lean čáhppat, almmatge liekkus,

dii Jerusalema nieiddat,

dego Kedara goađit,

nugo Salomo goahteloavdagat.

₆Allet geahča munnje

danne go lean čáhppat,

go beaivváš lea goardán mu.

Eadnán bártnit moaráhuvve munnje,

sii bidje mu gáhttet viidnegárddiid.

Iežan viidnegárddi mun in gáhtten.

₇Muital munnje, ráhkkásan,

gos don guođohat ealu,

gos livvadahtát dan gaskabeaivvi,

aman čádjidit du ustibiid ealu lusa.

₈Jos don it dan dieđe,

don nissoniin čábbámus,

de guora sávzaealu luottaid

ja doalvvo gihciidat guohtut

guođoheddjiid gođiid gurrii.

₉Ráhkkásan, dego dámmá

farao vovnna ovddas

don leat mu čalmmiin.

₁₀Čábbát leat du nierat

beallječiŋaid gaskkas,

čáppat du čeabet bearalbáttiidisguin!

₁₁Mii duddjot dutnje golleviđjjiid

ja viđjjiide silbaboaluid.

₁₂Go gonagas mieigá beavddis,

de mu nardusvuoiddas addá hája.

₁₃Mu ráhkis lea dego myrragiesaldat

čiččiidan gaskkas.

₁₄Mu ráhkis lea hennalieđđegihppu,

En-Gedi viidnegárddiin boibmojuvvon.

₁₅Don leat čáppat, mu iežan ráhkis,

don leat čáppat! Du čalmmit leat duvvát.

₁₆Don leat čáppat, mu iežan ustit,

don leat čáppat!

Munno oađđinsadji lea ruonas.

₁₇Munno viesu bielkkát leat sedermuoras,

sypressat munno dáhkki.