1Mun lean Sarona lieđđi,
legiid lilljá.
Irgi
2Dego lilljá bastilislánjáid gaskkas
lea mu ráhkis nieiddaid gaskkas.
Moarsi
3Dego ehpelmuorra
vuovddi muoraid gaskkas
lea mu ustit nuorra olbmáid gaskkas.
Mun háliduvan čohkkát su suoivanis,
su šattus lea njálggat mu guopmái.
4Son buvttii mu viidnevissui,
ráhkisvuođas leavgga vuolde.
5Áhpásmahttet mu
viidnemuorjegáhkuiguin,
virkkosmahttet mu ehpeliiguin,
mun lean buohcci ráhkisvuođas.
6Su gurut giehta lea mu oaivvi vuolde,
su olgeš giehta fátmmasta mu.
7Mun vuortnuhan din,
Jerusalema nieiddat,
gasellaid ja sarvvaáldduid bokte:
Allet bovtte ráhkisvuođa,
allet muosehuhte dan
ovdal go dat ieš hálida!
8Gula, ráhkkásan jietna!
Do son lea, son viehká váriid badjel,
njuiku badjel dieváid.
9Mu ráhkis lea dego gasella,
son lea nugo nuorra sarvva.
Duo son čuožžu min seainni duohken,
son guovlá láseráigge,
vákšu čeargalasa čađa.
10Mu ráhkis sárdnugoahtá.
Irgi
Čuožžil, mu ráhkis, vuolgu, čábbážan!
11Dálvi lea gollan, arvvit leat vássán.
12Lieđit ihtet eatnamis,
lávlunáigi lea boahtán,
turtelduvvá jietna gullo min eatnamis.
13Fiikonmuora šaddosat njálgot,
viidnemuoraid lieđit haksojit.
Čuožžil, mu ráhkis, vuolgu, čábbážan!
14Mu duvvá bákteskurččuid siste,
báktestealli suojis,
čájet munnje muođuidat,
divtte mu gullat du jiena!
Du jietna lea linis
ja du hápmi nu čáppis.
Earát
15Dohppejehket riebaniid,
riebančivggaid mat bilidit viidnegárddiid!
Min viidnegárddit leat aiddo lieđđumin.
Moarsi
16Mu ráhkis lea mu ja mun lean su,
son geahččá iežas ealu liljáid gaskkas.
17Go gáluda ja suoivanat guhkkot,
de boađe dalle, iežan ráhkis,
dego gasella, nugo nuorra sarvva
badjel váriid ja skurččuid!
