Sakarja 12

₁Profehtia. Hearrá sátni Israelii. Ná cealká Hearrá, son guhte lea lebben almmi, vuođđudan eatnama ja dahkan vuoiŋŋa olbmo siskkildassii: ₂Mun dagan Jerusalema cearkin mii gárihuhttá buot birasálbmogiid. Maiddái Juda gávpogat birastahttojuvvojit seammá ládje go Jerusalem. ₃Dan beaivvi mun dagan Jerusalema buot álbmogiidda lossa geađgin mii ii leat lihkaheames. Buot eatnama álbmogat čoagganit dan vuostá, muhto buot dat mat isket lihkahit dan, hávváduvvet. ₄Dan beaivvi, cealká Hearrá, mun časkkán buot heasttaid hirasvuođain ja daid riidejeddjiid mielahisvuođain. Mu čalmmit gehččet Judai, muhto álbmogiid heasttaid mun čalmmehuhtán. ₅Dalle Juda oaivámuččat jurddašit: Jerusalema ássiid givrodat lea Hearrás, Almmiveagaid Ipmilis, sin Ipmilis. ₆Dan beaivvi mun dagan Juda oaivámuččaid dollalihttin muorralátnii ja buolli spáiddarin gordnegihpu sisa, ja dolla loaktá olgeš beallái ja gurut beallái, buot álbmogiid juohke bealde. Muhto Jerusalema olbmot besset ain ássat gávpogisttiset.

₇Hearrá gádju vuos Juda álbmoga, vai Davida viessu ja Jerusalema ássit eai oaččo eambbo gudni go Juda. ₈Dan beaivvi Hearrá suodjala Jerusalema ássiid. Heajumus sis lea dan beaivvi dego David, ja Davida viessu lea dego Ipmil, dego Hearrá eŋgel gii manná sin ovddas. ₉Dan beaivvi mun duššadan buot álbmogiid mat fallehit Jerusalema.

₁₀Muhto Davida vissui ja Jerusalema ássiide mun golggahan árpmu ja rohkadusa vuoiŋŋa. Sii gehččet munnje, gehččet sutnje gean leat rehtten. Sii moraštit su dego olmmoš morašta áidna bártnis, sii čirrot su bahččagit dego olmmoš čierru vuosttašriegádeaddjis.

₁₁Dan beaivvi Jerusalemis čirrot seammá ollu go dalle go olbmot čirro Hadad-Rimmona Megiddojalgadasas. ₁₂Ja eanan doallá jábmiidčierrumiid, juohke sohka sierra: Davida sohka sierra ja sin nissonat sierra, Natana sohka sierra ja sin nissonat sierra, ₁₃Levi sohka sierra ja sin nissonat sierra, Šimi sohka sierra ja sin nissonat sierra, ₁₄buot eará sogat sierra ja sin nissonat sierra.