Sakarja 13

₁Dan beaivvi golggiida ája mii buhtista Davida viesu ja Jerusalema ássiid suttus ja buhtismeahttunvuođas.

₂Dan beaivvi, cealká Hearrá, Almmiveagaid Ipmil, mun heavahan eatnamis eahpeipmiliid, iige oktage šat namat daid. Maiddái vearriprofehtaid ja buhtismeahttunvuođa vuoiŋŋa mun jávkadan eatnamis. ₃Jos muhtun ain profehtastallá, de su iežas áhčči ja eadni dadjaba sutnje: “Don it oaččo eallit, dasgo don leat sárdnon giellásiid Hearrá nammii.” Su iežas áhčči ja eadni geat sahkanahtiiga su, čuggeba su jámas go son lea profehtastallamin. ₄Dan beaivvi juohke profehta heahpana oainnáhusaidis dihte iige šat gárvot guolgabiktasa, amas dovdojuvvot. ₅Son cealká: “Mun in leat profehta, mun lean eananbargi. Nuorravuođa rájes mun lean bargan eatnama.” ₆Jos muhtun jearrá sus: “Mat háviid dus leat rattis?” de son vástida: “Mun ožžon daid ustibiiddán viesus.”