Hearrá beaivi
1Jerusalem, Hearrá beaivi boahtá! Dan beaivvi don rieviduvvot, ja sálaš juogaduvvo du muvrraid siste. 2Mun čohkken buot álbmogiid soahtat Jerusalemiin. Gávpot váldojuvvo, viesut speddjojuvvojit ja nissonat rihppojuvvojit. Bealli gávpoga ássiin dolvojuvvo vieris eatnamii, muhto bázahas ii heavahuvvo. 3Hearrá ieš vuolgá soahtat daid álbmogiiguin, nugo ovdalge go vašálaš lea fallehan.
4Dan beaivvi son čuožžu Oljováris mii lea Jerusalema buohta nuorttas guvlui. Ja Oljovárri luoddana guovdat nuortan oarjjás, bealli váris gáidá davás, nubbi bealli lulás, ja daid gaskii šaddá hui stuorra leahki. 5Dii báhtarehpet váriid gaskka leahkeráigge, ja leahki ollá Asala rádjái. Dii báhtarehpet dego olbmot báhtaredje eanandoarggástusas dalle go Ussia lei Juda gonagassan. De Hearrá, din Ipmil, boahtá, ja buot basit oktan suinna.
6Dan beaivvi ii leat šat čoaskkis iige buolaš. 7Boahtá áigi – Hearrá diehtá goas dat boahtá – go álo lea beaivi iige eahket šat sevnnjot. 8Dalle ealli čázit golggiidit Jerusalemis, bealli dain nuortamerrii, nubbi bealligis oarjemerrii, gesiid dálvviid. 9Dalle Hearrá lea oppa eatnama gonagas. Son lea okta ja áidna Hearrá ja su namma áidna namma.
10Oppa eanan Geba rájes Rimmona rádjái Jerusalema lullelis šaddá duolbadassan, muhto Jerusalem bissu alla sajistis. Dat ollá Benjamina poartta rájes gitta boares Čiehkapoartta rádjái ja Hananeltoartna rájes gitta gonagasa viidnebohčingáriid rádjái. 11Doppe olbmot ásset, iige oktage šat vihahuvvo duššadeapmái. Jerusalem lea oadjebas.
12Muhto Hearrá diktá givssi deaividit buot álbmogiid mat vulget soahtat Jerusalemiin. Juohkehačča oažži guohcaga go son lea ain čuožžumin, čalmmit guohcagit rokkiidasaset ja njuovčča guohcaga su njálbmái. 13Dan beaivvi Hearrá vuolggaha moivvi sin gaskii. Sii fallehit guhtet guimmiideaset ja bajidit gieđa nubbi nuppi vuostá.
14Dalle Juda soahtá raddálaga Jerusalemiin, ja birasálbmogiid riggodagat čohkkejuvvojit čoahkkái: Golli, silba ja biktasiid eatnatvuohta.
15Seammá giksi deaivida heasttaid, mulaid, kamelaid, áseniid ja buot omiid mat leat soahtesiiddain. 16Buohkat geat báhcet dain álbmogiin mat fallehedje Jerusalema, bohtet dohko jagis jahkái rohkadallat gonagasa, Hearrá, Almmiveagaid Ipmila, ja doallat lastagoahtebasiid. 17Muhto jos muhtun eatnama čearddain ii boađe Jerusalemii rohkadallat gonagasa, Hearrá, Almmiveagaid Ipmila, de dasa ii boađe arvi. 18Jos egyptalaččat eai vuolgge johtui ja boađe Jerusalemii, de siige eai oaččo arvvi. Hearrá časká sin givssiin nugo son časká eará álbmogiidge, jos dat eai boađe doallat lastagoahtebasiid. 19Dat lea ráŋggáštus egyptalaččaide ja buot álbmogiidda mat eai boađe doallat lastagoahtebasiid.
20Dalle heasttaid golkkain lea čála: “Hearrái basuhuvvon”, ja Hearrá tempela báđit leat seammá basit go oaffarlihtit mat leat áltára ovddas. 21Juohke báhti Jerusalemis ja Judas lea basuhuvvon Hearrái, Almmiveagaid Ipmilii. Olbmot geat bohtet oaffaruššat, sáhttet vuoššat dain oaffarbierggu. Dalle eai leat šat gávppašeaddjit Hearrá, Almmiveagaid Ipmila, tempelis.
