1. Gonagasaid girji 21

₁Muhtun áiggi geažes dáhpáhuvai dát: Nabotis, gii lei eret Jisreelis, lei doppe viidnegárdi. Dat lei šloahta bálddas mii gulai Ahabii, Samaria gonagassii. ₂Ahab dajai Nabotii: “Atte munnje viidnegárddát urttasgárdin, dathan lea mu viesu bálddas. Mun attán dutnje buoret viidnegárddi dan sadjái, dahje mun oasttán dan dus ruđas, jos dáhtut.” ₃Muhto Nabot vástidii: “Hearrá várjalehkos mu addimis dutnje áhčiidan árbeeatnama!” ₄Ahab manai ruktosis hurvvasin ja eaddemielas, danin go jisreellaš Nabot lei biehttalan addimis sutnje áhčiidis árbeeatnama. Son veallánii seaŋgasis, jorggihii seaidnái muođuid iige gárron borrat. ₅Su áhkká Jesabel bođii su lusa ja jearai: “Manne don leat nie hurvvas? Manne it bora?” ₆Ahas vástidii: “Mun sárdnon jisreellaš Nabotiin ja bivden beassat oastit su viidnegárddi dahje addit sutnje eará viidnegárddi dan sadjái. Muhto son biehttalii addimis munnje iežas viidnegárddi.” ₇Dalle Jesabel dajai: “Almma don leat Israela gonagas? Lihka ja bora, de šattat buoret millii. Mun anán fuola das ahte oaččut jisreellaš Nabota viidnegárddi.” ₈Jesabel čálii reivviid Ahaba nammii, seilehii daid Ahaba seaillain ja sáddii daid vuorrasiidda ja oaivámuččaide geat ásse seammá gávpogis go Nabot. ₉Reivviide son lei čállán: “Gulahehket fásttu ja bidjet Nabota čohkkát álbmoga njunnošii. ₁₀Bidjet su buohta čohkkát guokte návccahis olbmá geat duođaštit: ‘Don leat garuhan Ipmila ja gonagasa.’ Dolvot su dasto olggos gávpogis ja geađgádehket jámas.”

₁₁Nabota ruovttugávpoga vuorrasat ja oaivámuččat dahke nugo Jesabel lei gohččon, aiddo nugo lei čállojuvvon daidda reivviide maid son lei sádden. ₁₂Sii gulahedje fásttu ja bidje Nabota čohkkát álbmoga njunnošii. ₁₃Guokte návccahis olbmá bohte ja čohkánedje su buohta. De soai duođašteigga Nabota vuostá álbmoga gullut ná: “Nabot lea garuhan Ipmila ja gonagasa.” Nabot dolvojuvvui gávpoga olggobeallái ja geađgáduvvui, nu ahte son jámii. ₁₄Dasto Jesabelii biddjojuvvui dát sátni: “Nabot lea geađgáduvvon jámas.” ₁₅Go Jesabel gulai ahte Nabot lei geađgáduvvon jámas, de son dajai Ahabii: “Mana dál váldit oapminat jisreellaš Nabota viidnegárddi maid son biehttalii vuovdimis dutnje. Nabot ii leat šat eallimin, son lea jápmán.” ₁₆Go Ahab gulai ahte jisreellaš Nabot lei jápmán, de son vulggii váldit oapminis Nabota viidnegárddi.

₁₇Muhto tišbelaš Eliai bođii dát Hearrá sátni: ₁₈“Mana deaivvadit Ahabiin, Israela gonagasain, gii ássá Samarias. Son lea dál Nabota viidnegárddis maid lea boahtán váldit oapminis. ₁₉Daja sutnje: Ná cealká Hearrá: ‘Don leat goddán olbmá. Áiggutgo don velá árbetge su?’ Daja sutnje vel dán Hearrá sáni: ‘Dan sajis gokko beatnagat njollo Nabota vara, de dat njollot maiddái du vara.’”

₂₀Ahab dajai Eliai: “Juogo don fas fáhtejit mu, vašálažžan?” “De fáhtejin”, Elia vástidii. “Don leat vuovdán iežat dahkat dan mii lea bahá Hearrá čalmmiin. ₂₁Danin Hearrá cealká ná: ‘Mun divttán bahá deaividit du. Mun suohpalasttán du eret ja duššadan Israelis buot du soga olbmábeale, sihke stuorráid ja smávváid. ₂₂Mun dagan du sohkii nugo dahken Jeroboama, Nebata bártni, sohkii ja Baša, Ahia bártni, sohkii, danin go don leat moaráhuhttán mu ja fillen Israela suddudit.’ ₂₃Maiddái Jesabela birra Hearrá lea sárdnon: ‘Beatnagat borret Jesabela Jisreela gávpotmuvrra guoras. ₂₄Daid Ahaba sogas geat jápmet gávpogii, borret beatnagat, ja daid geat jápmet muvrraid olggobeallái, borret almmi lottit.’”

₂₅Ii oktage leat Ahaba láhkái vuovdán iežas dahkat dan mii lea bahá Hearrá čalmmiin; su áhkká Jesabel ávžžuhii su dasa. ₂₆Son meannudii fasttit go bálvališgođii eahpeipmiliid aiddo nugo amorlaččat, geaid Hearrá duššadii israellaččaid ovddas.

₂₇Go Ahab gulai Elia sániid, de son gaikkodii biktasiiddis ja giesai horstta álás rupmaša birra. Son fástudii, veallái dušše horsta govččasin ja váccii hiljit. ₂₈Dalle tišbelaš Eliai bođii dát Hearrá sátni: ₂₉“Leatgo fuobmán mo Ahab lea vuollánan mu ovddas? Go son lea vuollánan nie, de mun in divtte lihkuhisvuođa boahtit vel su áigge; easkka su bártni áigge mun divttán lihkuhisvuođa boahtit su sohkii.”