1. Samuelgirji 2

₁Hanna rohkadalai:

₁₁Elkana máhcai ruktosis Ramai, ja bártnáš bázii báhppa Eli lusa bálvalit Hearrá. ₁₂Muhto Eli bártnit leigga bahás olbmát eabage jearran Hearrá dáhtu. ₁₃Báhpain lei álbmoga ektui dákkár vuoigatvuohta: Álo go muhtun buvttii njuovvanoaffara ja lei vuoššamin bierggu, de báhpa bálvaleaddji bođii golmmasuorat gáffal gieđas ₁₄ja čuggii ruitui, bánnui, báhtái dahje ruhkkui; buot maid gáffal gesii bajás, báhppa oaččui váldit alccesis. Nu sii dahke buot israellaččaide geat bohte Šiloi. ₁₅Muhtumin eai háhppehan oppa boaldit buoiddige, go báhpa bálvaleaddji juo bođii ja dajai dasa gii lei oaffaruššamin: “Atte dal bassinbierggu báhppii; son ii váldde dus vuššon bierggu, muhto njuoska bierggu.” ₁₆Go nubbi vástidii: “Vuos ferte boaldit buoiddi, váldde dasto maid dáhtut”, de báhpa bálvaleaddji dajai: “Ii fal nu; atte bierggu dállánaga, muđui mun válddán dan veagal.” ₁₇Nuorra olbmát suddudeigga sakka Hearrá muođuid ovddas, go soai ná badjelgeahčaiga Hearrá oaffarattáldagaid.

₁₈Muhto Samuel bálvalii Hearrá; bártnážin juo son anii beallemasefoda. ₁₉Juohke jagi su eadni goarui sutnje uhca oalgebiktasačča ja válddii dan fárrui go manai boatnjáinis oaffaruššat jahkásaš oaffara. ₂₀Dalle Eli buressivdnidii Elkana ja su áhká ja dajai: “Vare Hearrá attášii dutnje dán nissonis máná dan bártni sadjái gean son lea addán Hearrái.” De soai manaiga fas ruoktot. ₂₁Hearrá muittii Hanna, ja Hanna riegádahtii vel golbma bártni ja guokte nieidda. Muhto bártnáš Samuel stuorui Hearrá luhtte.

₂₂Eli lei dál hui boaris. Go son gulai mo su bártnit láhttiiga israellaččaiguin ja mo soai vealláiga daid nissoniiguin geat bálvaledje almmustusgoađi uvssa guoras, ₂₃de son dajai sudnuide: “Manne doai dahkabeahtti diekkáriid? Mun gulan buot olbmuin ahte dudno meanut leat bahát. ₂₄Alli nu daga, bártniidan! Dudnos ii leat buorre beaggin Hearrá álbmoga gaskkas. ₂₅Jos olmmoš sudduda nuppi vuostá, de Ipmil sáhttá soabahit, muhto jos olmmoš sudduda Hearrá vuostá, de gii dalle sáhttá soabahit?” Muhto soai eaba gullan áhčiska, danne go Hearrá dáhtui diktit sudno jápmit. ₂₆Muhto bártnáš Samuel stuorui ja lei illun Hearrái ja olbmuide.

₂₇De bođii Eli lusa Ipmila olmmái ja dajai sutnje: Ná cealká Hearrá: Mun almmustuvven áhčát sohkii go sii ledje Egyptas farao šlávvan ₂₈Buot Israela čearddain mun válljejin du soga bálvalit mu báhppan, oaffaruššat mu áltára alde, cahkkehit oaffardola ja atnit efoda mu muođuid ovddas. Ja du sohkii mun adden buot israellaččaid dollaoaffariid. ₂₉Manin don dalle badjelgeahčat mu oaffariid ja attáldagaid? Don gudnejahtát bártniidat eambbo go mu, go dii buoidudehpet iežadet buoremusain das maid mu álbmot Israel oaffaruššá.

₃₀Dan dihte cealká Hearrá, Israela Ipmil: Mun lean oktii lohpidan du sohkii ja du áhči sohkii ahte dii oažžubehtet álo bálvalit mu muođuid ovddas. Muhto dál mun cealkkán ahte nu ii eisege šatta. Mun gudnejahtán daid geat gudnejahttet mu, muhto dat geat badjelgehččet mu, vuoliduvvojit. ₃₁Bohtet beaivvit goas mun doaján du ja du áhči soga eallinfámu, nu ahte ii oktage du sogas eale boarisin. ₃₂Don geahčat gáđaštemiin juohkehažžii gii beassá leat ávkin Israelii, muhto du sogas ii eale oktage boarisin. ₃₃Mun in áiggo duššadit buot du olbmuid geat bálvalit mu áltáris, nu ahte du čalmmit čáskkašedje ja du eallinmokta sonašii. Muhto buohkat geat riegádit du vissui, jápmet báres agis. ₃₄Dat mii deaivida du bártniid Hofni ja Pinehasa, šaddá dutnje mearkan: Soai goappašagat jápmiba ovttahat beaivvi. ₃₅Mun válljen alccesan oskkáldas báhpa gii bargá mu miela ja dáhtu mielde, ja su sohka bálvala bistevaččat báhppan mu vuoidan gonagasa muođuid ovddas. ₃₆Buohkat geat báhcet du sogas bohtet dalle gearjidit sus ruđa ja láibbi, ja sii dadjet: “Divtte mu veahkehit báhpabargguin, vai mun fidnen láibebihtáža borrat.”