1. Samuelgirji 23

₁Davidii muitaluvvui ahte filistalaččat ledje fallehan Keila ja ledje dál stajideamen gordneráidnensajiid. ₂Dalle David jearai Hearrás: “Vuolggángo mun fallehit filistalaččaid?” Hearrá vástidii: “Vuolgge fallehit filistalaččaid ja gájo Keila.” ₃Muhto Davida olbmát dadje: “Mis lea doarvái ballamuš dáppe Judas. Galgatgo mii vuolgit velá Keilai filistalaččaid soahteveagaid vuostá?” ₄David jearai Hearrás velá oktii, ja Hearrá vástidii: “Vuolgge Keilai, mun attán filistalaččaid du gihtii.” ₅Dalle David ja su olbmát vulge Keilai ja fallehedje filistalaččaid, válde sis omiid ja časke sin ollásit. Nu David gájui Keila olbmuid. ₆Go Abjatar, Ahimeleka bárdni, lei báhtarettiin boahtán Davida lusa Keilai, de sus lei efod mielde.

₇Go Saulii muitaluvvui ahte David lei mannan Keilai, de son jurddašii: “Ipmil lea addán su mu gihtii. Son lea mannan gávpogii mas leat poarttat ja smarttit. Dál son lea čákŋan gillii!” ₈Saul rávkkai oppa soahteveagas čoahkkái vai beassá vuolgit Keilai birastahttit Davida ja su olbmáid. ₉Muhto go David árvidii ahte Saulis ledje bahás áigumušat, de son gohčui báhppa Abjatara buktit efoda. ₁₀Ja David rohkadalai: “Hearrá, Israela Ipmil, mun lean gullan ahte Saul áigu boahtit Keilai ja duššadit gávpoga mu dihte. ₁₁Addetgo Keila ráđđejeaddjit mu su gihtii? Boahtágo Saul deike, nugo du bálvaleaddji lea gullan? Hearrá, Israela Ipmil, vástit bálvaleaddjásat!” Hearrá vástidii: “Son boahtá.” ₁₂David jearai vel: “Addetgo Keila ráđđejeaddjit mu ja mu olbmáid Saula gihtii?” Hearrá vástidii: “Addet.” ₁₃Dalle David vulggii Keilas oktan olbmáidisguin, geat ledje sullii guhttačuođi, ja sii johtaledje gosa ain heivii. Go Saul gulai ahte David lei beassan báhtui Keilas, de son ii vuolgánge.

₁₄David orui Sifmeahci várrealážiin. Saul ozai su geažos áigge, muhto Ipmil ii diktán Davida šaddat su gihtii. ₁₅Go David lei orrumin Horšas Sifmeahcis, de son gulai ahte Saul lei vuolgán goddit su. ₁₆Muhto Saula bárdni Jonatan bođii Davida lusa Horšai ja arvvosmahtii su Ipmila nammii. ₁₇Son dajai: “Ale bala! Mu áhčči Saul ii fáhte du. Don šattat Israela gonagassan, ja mun šattan du lagamus olmmájin. Dan diehtá maiddái mu áhčči Saul.” ₁₈De soai dagaiga lihtu Hearrá čalmmiid ovddas. David bázii orrut Horšai, muhto Jonatan máhcai ruktosis.

₁₉Muhtin Sifa olbmát bohte Saula lusa Gibeai ja muitaledje: “David čiehkádallá min luhtte Horša várrealážiin, Hakilaváris lullelis Ješimona. ₂₀Boađe goas dáhtut, gonagas, de mii veahkehit du gávdnat su.” ₂₁Saul vástidii: “Hearrá buressivdnidehkos din, go dii árkkálmastibehtet mu! ₂₂Mannet ja háhket eambbo dieđuid ja gulaskuddet, gos son johtala ja geat leat oaidnán su doppe. Son lea gul hui juonalaš. ₂₃Gávnnahehket guđe čiehkádansajis son lea! Bohtet dasto mu lusa go dis leat vissis dieđut, de mun vuolggán din fárrui. Jos son lea dán eatnamis, de mun gal ozan su Juda juohke čiegas!” ₂₄Nu sii vulge Saula ovdalis Sifii.

David ja su olbmát ledje dalle Maonmeahcis lullelis Ješimona. ₂₅Go son gulai ahte Saul lei boahtimin olbmáidisguin ohcat su, de son njiejai bávttis mii lei Maonmeahcis. Saul gulai dan ja vulggii Maonmeahccái doarridit Davida.

₂₆Saul manai nuppe beale vári, David ja su olbmátgis nuppe beale. David geahččalii beassat Saulis báhtui, muhto Saul ja su olbmát ledje measta birastahttimin Davida ja su olbmáid ja dohppemin sin. ₂₇Dalle bođii Saula lusa áirras ja dajai: “Máhca hoahpus! Filistalaččat leat fallehan eatnama.” ₂₈Dalle Saul heittii doarrideames Davida ja vulggii filistalaččaid vuostá. Danin dat báiki gohčoduvvo Earrobáktin.