1. Samuelgirji 4

Israellaččat vulge soahtat filistalaččaiguin. Sii dahke siidda Eben Esera lahka, ja filistalaččat luoitaledje Afekii. ₂Filistalaččat divvo iežaset soahtan ládje Israela vuostá, ja šattai garra soahti. Israel vuoittáhalai filistalaččaide, ja soahtešilljui gahčče sullii njealljeduhát olbmá. ₃Go soahteveahka máhcai siidii, de Israela vuorrasat dadje: “Manne Hearrá lea diktán min vuoittáhallat filistalaččaide odne? Vižžot Hearrá lihtuárkka Šilos, vai dat lea min luhtte ja gádju min min vašálaččaid gieđas.” ₄Sii bidje sáni Šiloi ja vieččahedje Hearrá, Almmiveagaid Ipmila, lihtuárkka, su gean truvnnu kerubat guddet. Ipmila lihtuárkka mielde bođiiga goappašagat Eli bártnit, Hofni ja Pinehas.

₅Go Hearrá lihtuárka bođii siidii, de oppa Israel bajidii dakkár ávvučuorvasa ahte eanan doarggistii. ₆Filistalaččat gulle čuorvasa ja dadje: “Mii stuorra ávvučuorvasiid gullo hebrealaččaid siiddas?” Go sii ožžo diehtit ahte Hearrá lihtuárka lei boahtán siidii, ₇de sii suorganedje ja dadje: “Siidii lea boahtán muhtun ipmil. Vuoi min! Dákkár ii leat dáhpáhuvvan goassege ovdal. ₈Vuoi min! Gii gádju min dan veagalaš ipmila gieđas? Dathan lea dat ipmil gii časkkii egyptalaččaid meahcis buotlágán givssiiguin. ₉Muhto roahkasmuvvet ja lehket olbmát, filistalaččat, amadet šaddat bálvalit hebrealaččaid, nugo sii leat bálvalan din. Sohtet dego olbmát!” ₁₀De filistalaččat fallehedje, ja israellaččat vuoittáhalle ja báhtaredje, juohkehaš báikásis. Heavvu šattai hui stuorisin, ja Israelis gahčče golbmalogiduhát olbmá. ₁₁Ipmila árka váldojuvvui, ja Hofni ja Pinehas, Eli bártniguovttos, gottáhalaiga.

₁₂Muhtun Benjamina čeardda olmmái viehkalii soahtešiljus ja bođii seammá beaivvi Šiloi. Son lei gaikkodan biktasiid ja botkkuhan muoldda oaivvi ala. ₁₃Eli gii lei hui leaboheapme Ipmila árkka dihte, lei čohkkámin stuolustis poartaguoras geidnui čalmmiid. Go olmmái ollii gávpogii ja muitalii mii lei dáhpáhuvvan, de oppa gávpot bárgugođii. ₁₄Eli gulai bárguma ja jearai: “Maid mearkkaša dat šlápma?” Olmmái viegai Eli lusa muitalit sutnje ságaid. ₁₅Eli lei ovccilogigávcci jagi boaris, ja su čalmmit ledje smáiton, nu ahte son ii šat oaidnán. ₁₆Olmmái dajai sutnje: “Mun boađán soahtešiljus, mun báhtarin doppe odne.” Eli jearai: “Mo lea geavvan, bártnážan?” ₁₇Olmmái vástidii: “Israel lea báhtaran filistalaččain, ja ollu olbmot leat gahččan. Maiddái du bártniguovttos, Hofni ja Pinehas, leaba jápmán, ja Ipmila árka lea váldojuvvon.” ₁₈Go son namahii Ipmila árkka, de Eli gahčai stuolustis poartta gurrii sealggálassii, nu ahte su niski doddjui ja son jámii dasgo son lei boaris ja lossat. Son lei leamaš dalle Israela duopmárin njealljelogi jagi.

₁₉Eli mannji, Pinehasa áhkká, lei áhpeheapmin ja lahka riegádahttináiggi. Go son gulai ahte Ipmila árka lei váldojuvvon ja ahte su vuohppa ja boadnji leigga jápmán, de son dohppehalai ávttaide ja gahčai eatnamii ja riegádahtii. ₂₀Go son lei lahka jámi, de dat nissonat geat ledje veahkeheamen su, dadje: “Ale bala, don leat riegádahttán bártni.” Muhto son ii vástidan iige beroštan sin ságain. ₂₁Son bijai bárdnái nama Ikabod ja dajai: “Hearvásvuohta lea gáidan Israelis” – dainna son oaivvildii Ipmila árkka, mii lei váldojuvvon, ja vuohpas ja boatnjis. ₂₂Son dajai: “Hearvásvuohta lea gáidan Israelis, danin go Ipmila árka lea váldojuvvon.”