1Dát leat dan lihtu eavttut maid Hearrá gohčui Mosesa dahkat israellaččaiguin Moabis, earret dan lihtu maid son lei dahkan singuin Horebis.
Várrehusat rihkkumis lihtu
2Moses rávkkai lusas buot israellaččaid ja dajai sidjiide: Dii lehpet ieža oaidnán buot maid Hearrá dagai Egyptas faraoi, buot su bálvaleddjiide ja oppa su eatnamii. 3Dii lehpet iežadet čalmmiiguin oaidnán daid stuorra geahččalusaid, stuorra mearkkaid ja ipmašiid, 4muhto ovdal dán beaivvi Hearrá ii leat addán din ipmirdit maid din čalmmit leat oaidnán ja din bealjit gullan. 5Njealljelogi jagi mun láidejin din meahcis. Biktasat eai nohkan din badjelis eaige gápmagat din juolggis. 6Dii ehpet ožžon láibbi maid borrat ehpetge viinni ja vuollaga maid juhkat, vai ipmirdivččiidet ahte Hearrá lea din Ipmil. 7Go dii bođiidet dán báikái, de Hešbona gonagas Sihon ja Bašana gonagas Og vulggiiga soahtat minguin, muhto mii časkkiimet sudno. 8Mii válddiimet sudno eatnama ja attiimet dan opmodahkan Rubena ja Gada čearddaide ja Manasse čeardabeallái. 9Dollet oskkáldasat dán lihtu sániid, de buot din barggut menestuvvet didjiide.
10Dii buohkat čuožžubehtet odne Hearrá, Ipmileattet, muođuid ovddas: Čeardaoaivámuččat, vuorrasat, hoavddat ja buot israellaš olbmát, 11din mánát ja áhkát ja vierrásat geat leat din siiddain, din murrejeaddjit ja čáhceguoddit. 12Dál dii lehpet searvamin lihttui Hearráin, din Ipmiliin, vállelihttui maid son odne dahká dinguin. 13Odne son alida din iežas álbmogin ja šaddá din Ipmilin, nugo son lea lohpidan didjiide ja vurdnon din áhčiide Abrahamii, Isakii ja Jakobii. 14In mun daga dán vállelihtu duššefal dinguin, 15muhto dat dahkkojuvvo sihke buot minguin geat odne čuožžut dás Hearrá, Ipmileamet, muođuid ovddas, ja maiddái daiguin geat bohtet min maŋŋil.
16Diihan diehtibehtet ahte mii eliimet Egyptas ja gárttaimet boahtit máŋggaid álbmogiid eatnamiid čađa. 17Dii oinniidet daid álbmogiid fasttes eahpeipmilgovaid mat ledje dahkkojuvvon muoras, geađggis, silbbas ja gollis. 18Din gaskkas ii oaččo leat oktage olmmái iige nisson, ii oktage sohka iige čearda mii odne jorgala eret Hearrás, Ipmilisttámet, ja bálvališgoahtá daid álbmogiid ipmiliid. Din gaskkas ii oaččo leat ruohtas mii šaddada mirkko ja márona, 19ii oktage gii gullá garuhusa sániid, buressivdnida iežas ja jurddaša ahte sutnje goit geavvá bures, vaikko son vádjolage iežas buššon váimmu mielde. Son dagahivččii heavu sihke buriide ja baháide. 20Dakkár olbmui Hearrá ii dáhto addit ándagassii, muhto diktá garra moaris šloavvat su vuostá. Son gártá guoddit buot garuhusaid mat leat čállojuvvon dán girjái. Hearrá sihkku su nama almmi vuolde, 21 čuoldá su buot Israela čearddain ja diktá sutnje čuohcit buot garuhusaid mat dán láhkagirjjis leat mearriduvvon dasa, gii rihkku lihtu.
22Boahtti buolvvat, din iežadet mánát, dahje vierrásat geat bohtet gáiddus eatnamiin, oidnet buot dán eatnama givssiid ja buozalvasaid maiguin Hearrá lea ozahallan dan, 23mo rišša ja sálti lea boaldán oppa eatnama, nu ahte dasa ii sáhte gilvit, dat ii runit iige šaddat ii skáhčirage. Oppa eanan lea dego Sodoma ja Gomorra dahje Adma ja Sebojim, dalle go Hearrá moaris ja vašis duššadii daid. 24Dalle sii ja eará álbmogat jerret: “Manin Hearrá lea dahkan dáinna lágiin dán eatnamii? Manin su vašši lei nu stuoris?” 25Dalle sii ožžot dán vástádusa: “Sii hilgo Hearrá, áhčiideaset Ipmila, lihtu maid son dagai singuin dalle go lei buktimin sin Egyptas. 26Sii bálvališgohte eará ipmiliid ja rohkadalle daid, dakkár ipmiliid maid sii eai dovdan ja maid Hearrá ii lean addán sidjiide. 27Dan dihte Hearrá moarri cahkiidii dán eatnama vuostá, nu ahte son divttii dan vásihit buot garuhusaid mat leat čállojuvvon dán girjái. 28Moaris, suhtus ja garra vašis Hearrá rohttii sin sin iežaset eatnamis ja bálkestii sin nuppi eatnamii, gos sii ain orrot.”
29Čihkkojuvvon áššiid diehtá dušše Hearrá, min Ipmil, muhto dat áššit maid son lea almmustahttán, leat oaivvilduvvon midjiide ja min mánáide, vai mii álo doalašeimmet buot dán lága mearrádusaid.
