2. Mosesgirji 26

₁Ráhkat goađi logi loavddabihtás mat leat gođđojuvvon fiinna gerdojuvvon beallemasláiggis ja ruksesalit, purpurrukses ja karmosinrukses ullus, ja herve daid čábbát kerubagovaiguin. ₂Juohke loavddabihttá galgá leat guoktelogigávcci állana guhku ja njeallje állana govddu. Buot loavddabihtáin galgá leat oktat mihttu. ₃Vihtta loavddabihttá galget biddjojuvvot oktii ja nu maid dat eará vihtta. ₄Duddjo fárffuid ruksesalit láiggis nuppi loavdaga olggumuš ravdii, ja seammá láhkái nuppi loavdaga olggumuš bihtá ravdii. ₅Daga vihttalogi fárffu vuosttaš loavdagii ja vihttalogi fárffu nuppi loavdaga ravdii, nu ahte fárffut šaddet buohtalagaid. ₆Duddjo vihttalogi golleroahki ja roahkot daiguin loavdagiid oktii, nu ahte goahti šaddá oktan.

₇Duddjo vel gáiccaguolggain loavdagiid govččasin goađi ala. Duddjo oktanuppelohkái loavddabihtá. ₈Juohke loavdda galgá leat golbmalogi állana guhku ja njeallje állana govddu. Buot loavddabihtáin galgá leat oktat mihttu. ₉Njađe vihtta loavddabihtá oktan loavddan ja guhtta loavddabihtá oktan loavddan, ja bija dan guđáda guovtte geardái goađi ovddabeallái. ₁₀Duddjo vihttalogi fárffu nuppi loavdaga olggumuš bihtá ravdii, ja vihttalogi fárffu nuppi loavdaga ravdii. ₁₁Duddjo vihttalogi bronsaroahki ja roahkot daid fárffuide, nu ahte goahti šaddá ollisin. ₁₂Dat oassi loavdagis mii lea liiggás ja manná goađi ravdda badjel, oažžu heaŋgát goađi duogábealde. ₁₃Dat állanmihttu mii goađi loavdagiin lea goappáge bealde liiggás, oažžu heaŋgát goađi goappáge beali govččasin. ₁₄Duddjo goahtái gokčasa ruoksadin báidnojuvvon vierccanáhkiin ja dan ala vel gokčasa delfiinnanáhkiin.

₁₅Ráhkat goahtái fielluid akasiamuoras ja bija daid ceaggut. ₁₆Juohke fiellu galgá leat logi állana guhku ja beannot állana govddu. ₁₇Juohke fiellus galget leat guokte návlli mat leat lahkalagaid. Ráhkat buot goađi fielluid dakkárin. ₁₈Ráhkat guoktelogi fiellu goađi lulleseaidnái, lulás guvlui. ₁₉Ráhkat njealljelogi silbajuolggi dan guovttelogi fiellu vuollái; guđege fiellu vuollái guokte juolggi maidda návllit heivejit. ₂₀Ráhkat maiddái goađi nuppi seaidnái, davás guvlui, guoktelogi fiellu ₂₁ja njealljelogi silbajuolggi, guokte juolggi guđege fiellu vuollái. ₂₂Ráhkat goađi duogábeallái, oarjjás guvlui, guhtta fiellu. ₂₃Ráhkat guokte fiellu goađi čiegaide, duogábeallái. ₂₄Dát fiellut galget leat guovttegeardái vuolil ja guovttegeardái bajil gitta vuosttaš rieggá rádjái. Guktot čiehkafiellut galget leat dákkárat. ₂₅Das leat nappo gávcci fiellu ja daidda guhttanuppelohkái silbajuolggi, guokte juolggi guđege fiellu vuolde.

₂₆Duddjo akasiamuoras vihtta doaresmuora goađi nuppi seainni fielluide ₂₇ja vihtta doaresmuora goađi nuppi seainni fielluide ja vihtta doaresmuora goađi duogábeallái, oarjjás guvlui. ₂₈Gaskkamuš doaresmuorra mii lea fielluid gaskkamuttos, galgá mannat miehtá seainni geažis geahčái. ₂₉Skoađas fielluid golliin, duddjo gollis daid rieggáid maidda doaresmuorat nahkehuvvojit, ja skoađas maiddái doaresmuoraid golliin. ₃₀Cegge goađi aiddo dainna vugiin mii dutnje čájehuvvui váris.

₃₁Duddjo ovdaloavdaga ruksesalit, purpurrukses ja karmosinrukses ullus ja fiinna gerdojuvvon beallemasláiggis ja herve dan čábbát kerubagovaiguin. ₃₂Heŋge dan njealji akasiamuorrastolpui mat leat skoađastuvvon golliin, ja main leat gollefakkit ja mat čužžot njealji silbajuolggi veagas. ₃₃Heŋge ovdaloavdaga rohkiide ja doalvvo lihtumearkka árkka ovdaloavdaga siskkobeallái. Ovdaloavdda lea didjiide gaskaseaidni bassi boaššu ja basimus boaššu gaskkas. ₃₄Bija soabahussaji lihtumearkka árkka ala, mii lea basimus boaššus.

₃₅Bija beavddi ovdaloavdaga olggobeallái ja lámpájuolggi beavddi buohta goađi lulleseainni vuostá; bija beavddi davveseainni vuostá. ₃₆Duddjo goahteuksii gokčasa ruksesalit, purpurrukses ja karmosinrukses ullus ja fiinna gerdojuvvon beallemasláiggis, čáppa hearvaduodjin. ₃₇Duddjo gokčasii vihtta stoalppu akasiamuoras ja skoađas daid golliin. Stoalppuid fakkit galget leat gollis. Leike stoalppuid várás vihtta bronsajuolggi.