2. Mosesgirji 6

₁Hearrá celkkii Mosesii: “Dál don beasat oaidnit maid mun dagan faraoi: Mu gievrras giehta bágge su luoitit israellaččaid vuolgit, son njulgestaga ádjá sin eret iežas eatnamis.”

₂Ipmil sártnui Mosesii: “Mun lean Hearrá. ₃Mun almmustuvven Abrahamii, Isakii ja Jakobii Buotveagalaš Ipmilin, muhto iežan nama Hearrá mun in almmuhan sidjiide. ₄Mun dahken maiddái lihtu singuin ja lohpidin addit sidjiide Kanaana, dan eatnama gos sii ásse vierisin. ₅Dál mun lean gullan israellaččaid šuohkáhusaid, go egyptalaččat atnet sin šlávvan, ja mun lean muitán iežan lihtu. ₆Cealkke dan dihte israellaččaide: Mun lean Hearrá, mun doalvvun din eret Egypta bággobarggus ja beasttán din šlávvavuođas. Mun luoittán din friddjan geigejuvvon gieđain ja stuorra ráŋggáštusaiguin. ₇Mun válddán din iežan álbmogin ja lean din Ipmil, ja dii beassabehtet dovdat ahte mun lean Hearrá, din Ipmil, gii doalvvun din eret Egypta bággobarggus. ₈Mun doalvvun din dan eatnamii maid mun vurdnon addit Abrahamii, Isakii ja Jakobii. Mun attán dan didjiide árbin ja opmodahkan. Mun lean Hearrá.” ₉Dán Moses sártnui israellaččaide, muhto garra barggu dihte sii eai nagodan guldalit su.

₁₀Dalle Hearrá sártnui Mosesii: ₁₁“Mana dadjat faraoi, Egypta gonagassii, ahte son galgá luoitit israellaččaid vuolgit eatnamis.” ₁₂Moses vástidii Hearrái: “Israellaččat eai guldal mu. Mo dasto farao guldalivččii mu? Munhan illá máhtán rabastit njálmmige.”

₁₃Muhto Hearrá gohčui Mosesa ja Arona mannat israellaččaid lusa ja farao, Egypta gonagasa, lusa ja doalvut israellaččaid eret Egypta eatnamis.

₁₄Dát ledje guđege soga oaivámuččat: Rubena, Israela vuosttašriegádeaddji, bártnit ledje Henok, Pallu, Hesron ja Karmi. Dát ledje Rubena čeardda bearrašat. ₁₅Simeona bártnit ledje Jemuel, Jamin, Ohad, Jakin, Sohar ja Saul, gean eadni lei kanaanlaš nisson. Dát ledje Simeon čeardda bearrašat. ₁₆Dát ledje Levi bártnit agi mielde logahallojuvvon: Geršon, Kehat ja Merari. Levi elii čuođigolbmalogičieža jagi. ₁₇Geršona náli olbmot ledje Libni ja Šimi ja sudno bearrašat. ₁₈Kehata bártnit ledje Amram, Jishar, Hebron ja Ussiel. Kehat elii čuođigolbmalogigolbma jagi. ₁₉Merari bártnit ledje Mahli ja Muši. Dát ledje Levi čeardda sogat agi mielde logahallojuvvon. ₂₀Amram válddii áhkkán siesás Jokebeda gii riegádahtii sutnje Arona ja Mosesa. Amram elii čuođigolbmalogičieža jagi. ₂₁Jishara bártnit ledje Korah, Nefeg ja Sikri. ₂₂Ussiela bártnit ledje Mišael, Elsafan ja Sitri. ₂₃Aron válddii áhkkán Elišeba, Amminadaba nieidda, Nahšona oappá. Elišeba riegádahtii sutnje Nadaba, Abihu, Elasara ja Itamara. ₂₄Koraha bártnit ledje Assir, Elkana ja Abiasaf. Dát ledje korahlaččaid bearrašat. ₂₅Arona bárdni Elasar válddii áhkkán ovtta Putiela nieiddain, gii riegádahtii sutnje Pinehasa. Dát ledje levilaččaid sogaid oaivámuččat logahallojuvvon bearrašiid mielde. ₂₆Aron ja Moses leigga dat geaidda Hearrá celkkii: “Doalvu israellaččaid eret Egyptas veagaid mielde.” ₂₇Aiddo dát guovttos, Moses ja Aron, sártnuiga faraoi, Egypta gonagassii, ahte israellaččat galget luitojuvvot eret eatnamis.

₂₈Ná Hearrá sártnui Mosesii Egyptas: ₂₉“Mun lean Hearrá. Cealkke faraoi, Egypta gonagassii, buot maid mun sártnun dutnje.” ₃₀Muhto Moses vástidii Hearrái: “Munhan illá máhtán rabastit njálmmige. Mo dasto farao guldalivččii mu?”