2. Mosesgirji 7

₁Hearrá sártnui Mosesii: “Mun bijan du ipmilin faraoi, ja du viellja Aron šaddá du profehtan. ₂Don galggat sárdnut Aronii buot maid mun gohčun, ja du viellja Aron galgá sárdnut dan faraoi, vai son luoittášii israellaččaid vuolgit eatnamis. ₃Muhto mun buoššudan farao váimmu, iige son guldal dudno, vaikko mun dagan Egyptas máŋga mearkka ja oavddu. ₄Mun lokten gieđa Egypta vuostá ja doalvvun iežan soahteveagaid, iežan álbmoga, israellaččaid, eret Egyptas stuorra ráŋggáštusduomuiguin. ₅Go mun geigen gieđa Egypta vuostá ja doalvvun israellaččaid doppe eret, de egyptalaččat ipmirdit ahte mun lean Hearrá.” ₆Moses ja Aron dagaiga nugo Hearrá lei gohččon. ₇Moses lei gávccilogijahkásaš ja Aron gávccilogigolmmajahkásaš go soai sártnuiga faraoi.

₈Hearrá sártnui Mosesii ja Aronii: ₉“Go farao sárdnu dudnuide ja gohčču dahkat muhtun oavddu, de cealkke dalle Aronii: ‘Váldde soappát ja bálkes dan farao ovdii, de dat nuppástuvvá stuorra gearpmašin.’” ₁₀Nu Moses ja Aron manaiga farao lusa ja dagaiga nugo Hearrá lei gohččon. Aron bálkestii soappi farao ja su hoavvaolbmáid ovdii, ja dat nuppástuvai gearpmašin. ₁₁Dalle farao rávkkai lusas iežas eatnama viisáid ja noiddiid, ja Egypta diehttit dahke seammá ládje čiegus goansttaideasetguin: ₁₂Iešguhtege sis bálkestii soappis eatnamii, ja dat nuppástuvve gearpmašin. Muhto Arona soabbi njielai sin soppiid. ₁₃Farao buoššudii váimmus iige guldalan sudno, nugo Hearrá lei sárdnon.

₁₄Hearrá sártnui Mosesii: “Farao váibmu lea gážžár. Son biehttala luoitimis álbmoga vuolgit. ₁₅Mana farao lusa árrat iđedis go son lea mannamin eatnogáddái. Mana su ovddal ja váldde mielde soappi mii nuppástuvai gearpmašin. ₁₆Cealkke sutnje: Hearrá, hebrealaččaid Ipmil, vuolggahii mu du lusa bivdit ahte don luoittát su álbmoga bálvalit su meahcis. Muhto dán rádjái don it leat doahttalan. ₁₇Danin Hearrá cealká: Dát čájeha dutnje ahte mun lean Hearrá. Go mun časkkán Nileanu čázi dáinna soppiin mii mus lea gieđas, de čáhci nuppástuvvá varran. ₁₈Nileanu guolit jápmet ja eatnu háisugoahtá, nu ahte egyptalaččat eai sáhte juhkat dan čázi.”

₁₉Hearrá sártnui vel Mosesii: “Gohčo Arona váldit soappis ja geiget dan Egypta čáziid badjel, dan jogaid, kanálaid ja ládduid badjel, buot daid báikkiid badjel maidda lea čoggon čáhci. Dalle čáhci nuppástuvvá varran, ja varra lea oppa Egyptas, velá muorralihtiin ja geađgeruhkuinge.” ₂₀Moses ja Aron dagaiga nugo Hearrá lei gohččon. Aron geigii soappis ja časkkii dainna Nileanu čázi farao ja su hoavvaolbmáid oaidnut, ja buot čáhci nuppástuvai varran. ₂₁Guolit jápme ja eatnu háisugođii, nu ahte egyptalaččat eai sáhttán juhkat dan čázi. Varra lei juohke sajis Egyptas. ₂₂Muhto Egypta diehttit dahke seammá láhkái čiegus goansttaideasetguin. Farao váibmu bisui gážžárin, iige son guldalan Mosesa ja Arona, nugo Hearrá lei sárdnon. ₂₃Farao vulggii ruoktot šloahttasis iige beroštan dán oavddusge. ₂₄Muhto egyptalaččat šadde roggat Nileanu gáddeguorain juhkančázi, danin go eanu čázi sii eai sáhttán juhkat.

₂₅Čieža beaivvi golle das go Hearrá lei časkán Nileanu.